எங்கே செல்லும் இந்தப் பாதை .....

அடவு...

2012-01-30T11:15:00.001+05:30

செவ்வகப் பெட்டிக்குள்

பாம்புகளின் ஆட்டம்

புணர்தலின் வேட்கையோடு பார்க்கும்

வரவேற்பறைக் கண்கள்

சாரைகள் இரண்டு (ஆண்,பெண்)

ஸ்லோபாய்சன் தடவிய தமிழை

காலர் மைக்குகளின் வழியே

துப்பிக்கொண்டிருக்க

மயில் ஆடும் திணைக்களத்தில்

மான் ஆடும் ஆங்கிலத்தில்

அனுதினமும்

பாம்பாட்டியின் மகுடிச் சத்தம்

கேட்டு மயங்கிய

நாகப்பாம்புகளின் தலைவனுக்கு

உறக்கத்திற்கு முந்தைய நிமிடத்தில்

புதிய டயாப்பரை மாட்டினான்

கட்சியின் கடைசித்தொண்டன்..

ஏதோ ஒரு நவீனத்துவ கவிதைகள்!!!...

2012-01-28T00:02:00.006+05:30

அ

டு

க்

க

க் குடியிருப்பின் முறை வா

ச

ல் செய்பவள்

வரவில்லை இன்று

காற்றில்

அ
லை

கி

ன்

ற

ன

குப்பைகள்..

.......................................

நேரெதிர் சந்திப்பின்போதும்

ம்கமு திருப்பிக்கொள்ளும்

பழைய... ...

நண்பனின்

நினைவில்

நான்

இப்போது என்னவாக

இருப்பேன்..

..................................................................

கடை வீதியில்

ஒரே கூட்டம்

ஒருவரை ஒருவர்

இடித்தபடி ந...க...ரு..ம்

மக்களில்

ஒவ்வொருவருக்கும்

ஒரு

இ

ல க்

கு

.......................................................

த த் தி த்

தாவும் குருவி

சமயங்களில்

ரே

ய

உ

பறக்கிறது

ஆள் அரவம் கண்டு..

........................................................

ஒ ங் று

ழு க

ற்

க ந்

து லை

கிடந்த புத்தகங்களாய்

புணர்தலின் முடிவில்

நாம்...

பின்னூட்டங்களில் நீங்களும் இம்மாதிரி முயற்சி செய்யுங்களேன்..

வண்ணத்துப்பூச்சி பற்றிய கவிதை - 3...

2012-01-27T12:29:00.002+05:30

பத்தாம் வகுப்பில்

உடன் படித்த ரேணுகாதேவி

ஒரு சலவைத்தொழிலாளியின் மகள்

அப்போது மிகுதியாக

சாதி பார்த்துப்பழகும் என் ஊரில்

அவளென்றால் யாவருக்கும் பிரியம்தான்

அழகு தேவதை அவள்

ஒரு நாள் அவளும் நானும்

இன்னபிற தோழிகள் சூழ

பள்ளியின் விளையாட்டு மைதானத்தில்

குழுமியிருந்தபோது

கடந்து போனதொரு வண்ணத்துப்பூச்சியொன்று

”அய்.. வன்னாத்திப் பூச்சி”யென்றேன்

சடாரெனக் கோபம் கொண்ட ரேணுகா

“அது வண்ணத்துப்பூச்சிடா” எனத் திருத்தினாள்..

பணிரெண்டாம் வகுப்பில்

ஒரு அரையாண்டுத் தேர்வின் மத்தியில்

எங்கள் இருவரின் காதலை

கழிவறை சுவற்றில் உறுதிப்படுத்தினார்கள்

சக தோழர்கள் ..

எங்கள் காதலின் உறுதியால்

ஒரு சலவைத் தொழிலாளியின் குடும்பம்

ஊரை விட்டு வெளியேறும் உத்தரவை

ஏற்றுக்கொண்டது

முதல்நாள் இரவே

இருவரும் ஓடிப்போகும் முடிவெடுத்து

ஊர் எல்லையைக் கடக்குமுன் பிடிபட்டு

அவரவர் உறவுகளிடம் ஒப்படைக்கப்பட்டோம்..

மறுநாள் காலை

அவளின் தற்கொலையுடன் விடிய

நான் என் தற்கொலை முயற்சியில் காப்பற்றப்பட

இப்போதும்

ஊருக்குப் போனால்

தனியறையில் இருக்கும் நேரம்

எங்கிருந்தோ வருகிறது

வண்ணத்துப்பூச்சியொன்று

அறையின் ஏதோ ஒரு மூலையில்

வெகு நேரம் தவமிருக்கும்

பின்

ஏதோ ஒரு பல்லிக்கு உணவாகி

செத்துப்போகும்..

ஒவ்வொரு முறையும்

ஒவ்வொரு வண்ணத்துப்பூச்சி..

ஊருக்குப் போவதை நிறுத்திய பின்னரும்

எப்போதாவது

இந்த நகரத்தின் கொடிய இரவுகளில்

சாத்திய சன்னல்களையும் மீறி

எப்படியோ வந்துவிடுகிறது

ஒரு வண்ணத்துப்பூச்சி

எங்கிருந்தோ வந்து சேர்க்கிறது

ஒரு பல்லி..

சமீபமாக

வண்ணத்துப்பூச்சிகளைத் தின்றால்

செத்துப்போக முடியுமா? என

விசாரித்துக்கொண்டிருக்கிறேன்..

வண்ணத்துப்பூச்சி பற்றிய கவிதை - 2...

2012-01-24T13:26:00.000+05:30

பிரியா பனிரெண்டாம் வகுப்பு

தும்பிகளும்

வண்ணத்துப்பூச்சிகளும் நிறைந்த வயது

பூக்கள்

அதிலும்

சாமந்தியென்றால் கொள்ளைப்பிரியம்

எல்லா வண்ணங்களிலும்

வண்ணத்துப்பூச்சி வரைவாள்

ஒவ்வொரு நோட்டுக்கும்

ஒரு கலர் வண்ணத்துப்பூச்சி

அட்டையை அலங்கரிக்கும்..

பிரியா விலங்கியல் முதல் ஆண்டு

கல்லூரியில் விலங்கியல்தான்

கிடைத்தது

பொம்பளை பிள்ளைக்கு அதுவே அதிகம்

என்றார் மாமா,

இப்போதைக்கு கல்யாணம் கிடையாது என்பதால்

ஒத்துக்கொண்டாள் பிரியா

சோதனைச்சாலையில் பெரிய

சோதனையாகிவிட்டது அவளுக்கு

எலி

தவளை

கரப்பான் பூச்சி

இன்னபிற பூச்சி வகைகளை

ஆராய்வதில் பிரச்சினை இல்லை

வண்ணத்துப்பூச்சிகள் பற்றிய ஆராய்ச்சியில்

அவள் நிலைகுலைந்தாள்

இறந்த வண்ணத்துப்பூச்சிகள்

மூன்றாவது வருடமுடிவுவரை

விரட்டின

தேர்வு முடிவுகள் சாதகமாக இல்லாததால்

சரவணனுக்கு வாழ்க்கைப்பட்டு

சென்னைக்கு வண்டியேறினாள்

கட்டிடங்களால் நிரம்பிய சென்னையில்

வண்ணத்துப்பூச்சிகள் இல்லாத

வாழ்க்கை..

பிரியாவின் மகள் பாவனா

ரங்கனாதன் தெருவில்

ஒரு சாலை விற்பனையாளனிடம்

விதவிதமாய்

சுவற்றில் ஒட்டும் பேப்பர்

வண்ணத்துப்பூச்சிகளை

வாங்கி வந்து

அறை முழுவதும் ஒட்டியிருந்தாள்

பாவனா..

பாவனாவின் அம்மா பிரியா

பாவனாவை

கல்லூரியில் சேர்க்கும் காலம்

கணிப்பொறி இயலில் சேர்த்து

வண்ணத்துப்பூச்சிகளை காப்பாற்றியதாக

பெருமை கொண்டாள்

அரசுக் கல்லூரியில் படித்த

அம்மா பிரியா..

வண்ணத்துப்பூச்சி பற்றிய கவிதை...

2012-01-23T15:48:00.000+05:30

அவன் தன் காதலியைக் கொஞ்சி

ஒரு கடிதம் எழுதினான்

அன்பே,

என் வண்ணத்துப்பூச்சியே

நான் உன்னை மிகவும் நேசிக்கிறேன்

ஆனால்

சில நேரங்களில்

நீ அனிந்து வரும் பிங்க்

சல்வாரை நான் வெறுக்கிறேன்

நீ வரும்ப்போதெல்லாம்

பரவும் வண்ணத்துப்பூச்சி வாசனையை

அது தருவதில்லை

ஊதா சுடிதார்தான் பிரமாதம்

எனவே

என் பிரிய வண்ணத்துப்பூச்சியே

இனி நீ ஊதாவில்தான் வரவேண்டும்..

அவள்

பதில் எழுதினாள்

டேய்! பரதேசி

வண்ணத்துப்பூச்சியை

எனக்கு பிடிக்கவே பிடிக்காது

எனக்குப் பிடிக்காத

நான் வெறுக்கும் பூச்சியை

எப்போது நீ நேசிக்க ஆரம்பித்தாயோ

இனி

உனக்கும் எனக்கும்

ஒன்றும் இல்லை

மேலும் ஊதா நிறத்தில்

நான் உடுத்தவே மாட்டேன்..

அதன்பிறகு

வண்ணத்துப்பூச்சியை பார்க்கும்போதெல்லாம்

வெறுப்பான் அவன்

சோகமாவாள் அவள்..

அப்புறம்

இந்தக்கவிதையில் வரும்

வண்ணத்துப்பூச்சியை

யாரும்

நிராகரிக்கவோ

நேசிக்கவோ

நேர்ந்தால்

நானும்

அந்த வண்ணத்துப்பூச்சியும்

பொறுப்பில்லை..

அதே போல்

இனி எங்காவது

ஊதா தவிர

வேறு வண்ணங்களிலும்

வரும் வண்ணத்துப்பூச்சிகளை

இனி உங்கள் காதலியோடு

ஒப்பிடாதீர்கள்,

சில வேளைகளில்

அதே காதலியோடு

அது உங்களை சேர்த்து வைக்கும்

அபாயம் நேரிடலாம்..

நானும், நள்ளிரவு பிசாசுகளும்...

2012-01-21T13:02:00.001+05:30

நள்ளிரவு தாண்டிய பொழுதுகளில்

வழக்கமாக வழிமறித்து

பணம் வாங்கும்

பிசாசுகள் இரண்டு

நேற்று நள்ளிரவிலும் கை காட்டியது

பைக்கை ஓரம்கட்டி

இன்று என்னிடம் பணம் இல்லை

மொத்தப் பணமும் குடித்தாகிவிட்டது

மேலும் டிப்ஸ் தராமல் கடன் சொல்லிவிட்டுத்தான்

வந்தேன் என்றேன்

எனது பர்சை வாங்கி நோண்டிய பிசாசொன்று

சக பிசாசிடம் பணம் இல்லாததை உறுதி செய்தது

இன்றைக்குப் பார்த்து வருமானமே இல்லை என்றும்

குறைந்த வருவாயை மேலதிகாரப் பிசாசுகளிடம்

கொண்டு சென்றால் அவைகள் தன் பரம்பரையை திட்டும் எனவும்

ஒரு பிசாசு மிகுந்த வருத்தத்துடன் சொன்னது

இன்னொரு பிசாசோ

இனி நான் வீட்டுக்குப் போகும்போது

குறைந்த பட்சம் ஐம்பது ரூபாயாவது

வைத்திருக்க வேண்டும் என

வேண்டுகோள் வைத்தது

இன்னொரு முறை

இவ்வழியே வரும்போது சேர்த்துத் தருகிறேன் என

அவைகளிடமே ரூ.50 கடன் வாங்கி

வீடு வந்தேன்..

திலீபனுடன் 12 நாட்கள்...

2012-01-20T11:34:00.000+05:30

பசித்தது ...

அவனே

உணவானான் - காசி ஆனந்தன்.

தியாகத்தின் பாதையில் திலீபனுடன் 12 நாட்கள் எனும் புத்தகம் "தோழமை" வெளியீடாக திரு.மு.வே.யோ. வாஞ்சிநாதன் அவர்களால் எழுதப்பட்ட புத்தகம். இந்திய அமைதிப்படை இலங்கையில் நிலைகொண்டிருந்தபோது திலீபன் கீழ்க்கண்ட ஐந்து கோரிக்கைகளை வலியுறுத்தி சாகும் வரை உண்ணாவிரதம் இருந்தார்.

1. பயங்கரவாதத் தடைச் சட்டத்தின் கீழ் இன்னும் தடுப்புக் காவலில் அல்லது

சிறைகளில் உள்ளோர் விடுவிக்கப்பட வேண்டும்.

2. புனர்வாழ்வு என்ற பெயரில் தமிழர் தாயகத்தில் நடாத்தப்படும்

சிங்களக் குடியேற்றம், உடனடியாக நிறுத்தப்படல் வேண்டும்.

3. இடைக்கால அரசு நிறுவப்படும் வரை "புனர்வாழ்வு" என்று அழைக்கப்படும்

சகல வேலைகளும் நிறுத்தப்பட வேண்டும்.

4. வடக்கு - கிழக்கு மாகாணங்களில் பொலிஸ் நிலையங்கள் திறக்கப்படுவது

உடனடியாக நிறுத்தப்படவேண்டும்.

5. இந்தியா அமைதிப்படையின் மேற்பார்வையில், ஊர்க்காவல் படை என

அழைக்கப்படுவோருக்கு வழங்கப்பட்ட ஆயுதங்கள் திரும்பப் பெறப்பட்டு,

தமிழ்க் கிராமங்கள், பள்ளிகூடங்கள் ஆகியவற்றில் குடிகொண்டுள்ள

இராணுவ, பொலிஸ் நிலையங்கள் மூடப்பட வேண்டும்.

மேற்படி கோரிக்கைகளை வலியுறுத்தி திலீபன் சாகும்வரை உண்ணாவிரதத்தை மேற்க்கொண்டார். அதிலும் ஒரு சொட்டு தண்ணீர் கூட அருந்தாமல் உண்ணாவிரதம் மேற்கொள்ளப்போவதாக அறிவித்தார்.

அவர் உண்ணாவிரதம் மேற்கொண்ட 12 நாட்களும் திரு.வாஞ்சிநாதன் அவர்கள் திலீபனுடன் உடனிருந்த பரபரப்பான நாட்களை நம் கண்முன் நிருத்துகிறார்.

ஒவ்வொரு நாளும் திலீபனின் உடல் மாற்றங்கள். அவரின் போராட்டத்தால் நடந்த அரசியல் நிகழ்வுகள். மக்கள் எழுச்சி, இந்திய, இலங்கை அரசின் கயவாளித்தனங்கள் என அனைத்தையும் சுருக்கமாக சொல்கிறார்.

புத்தகத்தை வாசிக்கும்போது நாமும் ஒவ்வொரு அத்தியாத்திலும் திலீபனுக்காகவும் நமது இனத்தின் ரத்த உறவுகளுக்காகவும் கண்ணீர் வடிக்க நேரிடுகிறது.

தன் இனத்துக்காக தன் உயிரையே தியாகம் செய்த திலீபன்தான் நமக்கு குலதெய்வமாக இருக்க வேண்டியவன். ஆனால் நாம் தமிழகத்தில் யார் யாருக்கோ அடிமையாக இருப்பதை பெருமையாக நினைக்கிறோம்.

இந்தியாவில் தமிழகத்தைப் பொருத்தவரை ஈழப் போராட்டம் என்பது அரசியல் லாபங்களுக்காக ஒவ்வொரு அரசியல் தலைவரும் ஒவ்வொரு விதமாய் கையாண்ட துரோகமும் நம்மை கூனிக்குறுக வைக்கிறது. இந்திராகாந்தி, எம்.ஜி.ஆருக்குப் பின் நெடுமாறன் வைகோ தவிர யாரும் அக்கறை கொள்ளவில்லை. கருணாநிதி விடுதலைப்புலிகள் மீதான வெறுப்பில் மொத்த இனத்தையும் சோனியாவுடன் பழி தீர்த்துக்கொண்டார்.

இப்போதும் விடுதலைப்புலிகள் இல்லாத ஈழத்தில் இன்னமும் முள்வேலி முகாமுக்குள்தான் பெரும்பாலான குடும்பங்கள் இருக்கின்றன. இதுவரை இந்திய அரசோ, அதில் அங்கம் வகிக்கும் கருணாநிதியோ அது பற்றி வாய்திறக்கவே இல்லை. இங்கிருக்கும் முகாம்களில் இருப்பவர்களுக்கு இப்போது ஜெயலலிதா செய்யும் உதவிகளைக் கூட கருணாநிதி தன்னுடைய ஆட்சியில் செய்யவில்லை. அவர் செய்ததெல்லாம் தன்னை பற்றிய பாராட்டு விழாக்களும், ஈழம் பற்றி பேசியவர்களுக்கு சிறை வாசமும்தான். சென்ற தேர்தலில் கருணாநிதி,திருமாவளவனும்,ராமதாசும் நடத்திய கேளிக்கூத்துகளுக்கு மக்கள் தகுந்த பாடத்தை கற்பித்தும் இப்போது வரைக்குமே அவர்கள் தங்களை திருத்திக்கொள்ளவில்லை.

தியாகத்தின் பாதையில் திலீபனுடன் 12 நாட்கள்

வெளியீடு : தோழமை பதிப்பகம்

விலை : ரூ. 55

பயோடேட்டா - தொண்டன்

2012-01-18T14:22:00.000+05:30

பெயர் : அடிமை அல்லது தொண்டன்

இயற்பெயர் : அடிப்படை உறுப்பினர்

தலைவர் : கட்சியின் தலைவர்
துணைத் தலைவர்கள் : தலைவரின், மனைவி, மகன்,மகள்

பேரப்பிள்ளைகள்

மேலும்
துணைத் தலைவர்கள் :தலைவரின் சின்ன வீடு, மைத்துனன், மா.செ’க்கள்

வயது : திராவிடக் குஞ்சுகள் இன்னும் வளரவே இல்லை

தொழில் : போஸ்டர் ஒட்டுவது, கோஷம் போடுவது

பலம் : அறிவு வளராமல் இருப்பது
பலவீனம் : தலைவனை, தலைவியை கடவுளாக பார்ப்பது
நீண்ட கால சாதனைகள் : நிரந்தரத் தலைவன், பொதுச்செயலாளர்

சமீபத்திய சாதனைகள் : சீமான், விஜய், அன்னா அசாரே

போன்றவர்களையும் நம்புவது

நீண்ட கால எரிச்சல் : பிரியாணியும், குவாட்டரும் மட்டுமே கொடுப்பது

சமீபத்திய எரிச்சல்     : கட்சிக்காரனுக்கு ஓட்டுக்கு துட்டு தராதது
மக்கள்                           : இலவச அரிசிக்கு வரிசையில் நிற்பவர்கள்
சொத்து மதிப்பு   : சில கரை வேட்டிகளும், வினைல் போஸ்டர்களும்
நண்பர்கள்       : சக தொண்டர்கள் மட்டும் (பதவியில் இருப்பவர்கள் அல்ல)
எதிரிகள்     : எதிர் அணியில் இருப்பவர்கள்

(தேர்தலுக்கு தேர்தல் மாறும்)

ஆசை : சிறந்த அடிமையாக காட்டிக்கொள்ள

நிராசை : பிள்ளைகள் கல்வி கற்பதால் சொந்த வீட்டிலேயே

பருப்பு வேகாதது

பாராட்டுக்குரியது : கருணாநிதி, எம்,ஜி,ஆர், ஜெயலலிதா இப்போது

விஜயகாந்த் என தலைவர்களை உருவாக்கியது
பயம் : வீட்டில் மனைவியிடம் மட்டும்
கோபம் : இயலாமையில் கெட்ட வார்த்தைகள் உபயோகிப்பது

காணாமல் போனவை : ஒவ்வொரு வீட்டிலும் ஒரே கட்சியை ஆதரிப்பது

(இப்பல்லாம் ஒரே வீட்டில் பல கட்சித் தொண்டர்கள்)
புதியவை : இணையத்தில் வீரம் பேசுவது
கருத்து : தலைவர் சொல் மிக்க மந்திரம் இல்லை

டிஸ்கி : ஒவ்வொரு அரசியல் கட்சியும் தனியார் நிறுவனம்

ஆகவும் அதன் தலைவர்கள், அவரின் குடும்பத்தார்கள்

பதவிகளையும் அதிகாரத்தையும் வைத்துக்கொண்டு

ஏமாற்றுகிறார்கள் என்பதை அறிந்தே அவர்கள்

பின்னால் வாலாட்டும் தொண்டர்களின்

புத்தியைப் பார்த்து பரிதாபமே வருகிறது..

பாழாய்ப் போகும் நிலங்கள் (ஒரு பின் நவீனத்துவ கவிதை?)

2012-01-17T11:59:00.000+05:30

சென்னை மாநகரப் பேரூந்தின்

அன்றாடப் பயணி ஒருவன்

சில்லரைகளுக்கான காத்திருப்பின் தவிப்பை உணர முடியாத

நடுத்தர வாசியின் ஷேர் ஆட்டோ பயணத்தின்
அடைசலில் சிக்கி இறங்கியபின் உடை கலைந்த

வருத்தங்கள் பற்றி கவலைப்பட தேவையற்ற
கார் வைத்திருப்பவன் தன் அலுவலக நேரம் முடிந்தபின்

பாருக்குப் போகும்போது மனப்பாடம் செய்த பொய்யை

சொல்ல வேண்டிய அவசியமற்ற
பணக்கார முதலாளியின்

விமானப் பயணத்தின் தாமதம் அறிந்தும்
கவலை கொள்ளாது அருகிலிருந்தவளின் சில்மிஷத்தில்
இந்த நாள் கடந்துபோகும் இரவு வேளையில்

வெளிநாட்டு வாடிக்கையாளன் கொடுத்த
மரபணு மாற்ற விதையை பயன்படுத்தும்
ஒரு அப்பாவி ஏழை விவசாயியின் மகனாகிய நான்

சென்னை நோக்கி வருகிறேன் புதிய வேலையொன்றைத்
தேடி..

மழை நாட்கள்...

2012-01-14T12:39:00.000+05:30

உன்னைப் பார்த்த முதல் கனத்தில்
உன்மேல் காதல் வரவில்லை
காரனம்
நீ எனக்கு

முதல் பெண் அல்ல,

நானும் உனக்கு அப்படித்தான் என நினைக்கிறேன்..

நீயும்,

நானும்
சில சந்திப்புகளால்
காதல் வயப்பட்டோம்..

நீ எனக்காகவும்,

நான் உனக்காகவும்

சிலவற்றை மாற்றிக்கொண்டோம்

சிலவற்றை மாற்றிக்கொண்டது மாதிரி

நடித்தோம்..

நீ என்னை மிகவும் நேசித்தாய்

நானும் அப்படிதான்.,

உயிருக்கு உயிராக என்று வைத்துகொள்ளலாம்..

நீ

பேச,

சாப்பிட,

உடுத்த,

பரிசளிக்க

நான்தான் செலவு செய்தேன்..

நீ அடிக்கடி கோபப்பட்டாய்..

நான் விலகி செல்ல ஆரம்பித்தேன்..

நீ சில காரணங்களை சொன்னாய்

நானும் சொன்னேன்.

நீ யாரையோ திருமணம் செய்துகொண்டாய்,

நானும் ஒருத்தியுடன் வாழ்கிறேன்..

விதி நம்மை
ஒரு நேர்கோட்டில் நிருத்தியபோது
நாம்
நம் குழந்தைகளை அறிமுகப்படுத்தி வைத்தோம்
அவர்கள்
விளையாட்டின் சுவாரஸ்யத்தில்
நம்மை மறந்தபோது
என் கைகளை
இறுகப்பற்றிக்கொண்டாய்
நம் கண்களில்
கொஞ்சம் கண்ணீரும்
கொஞ்சம் காதலும்
எட்டிப்பார்த்தது..

புத்தகக் கண்காட்சியும், இரண்டு அடிதடிகளும்...

2012-01-13T11:35:00.003+05:30

சண்டை : 1

நேற்று (12.01.2012) மாலை புத்தகக் கண்காட்சியில் உயிர் எழுத்து அரங்கின் முன்னால் வசுமித்ரன், சங்கரராம சுப்பிரமணியன் இருவரும் இலக்கிய விவாதங்கள் முற்றிய நிலையில் கட்டிப்புரண்டு சண்டையிட்டனர். தீவிர இலக்கியவாதிகள் முன்னிலையில் நடந்த இந்த சண்டை சுற்றியுள்ள நண்பர்களால் விலக்கிவிடப்பட்டாலும் அந்த நேரத்தில் அவ்விடத்தில் இருந்த சிலர் இவர்களை பார்த்த விதம் வருத்தமாக இருந்தது. என்னதான் படித்தவர்களாக இருந்தாலும் மனதளவில் இன்னும் மாறாமல் இருக்கும் இவர்கள் படைப்பாளிகளாக இந்த சமூகத்துக்கு என்ன கொடுத்துவிட முடியும்?.

இந்த சண்டைக்கு நீண்டநாள் கருத்து மோதல் காரனமாக சொல்லப்பட்டாலும், ஊர் கூடியிருக்கும் ஒரு பொது அரங்கில் அதிலும் புத்தகக்கண்காட்சியில் நடந்த இந்த கேலிக்கூத்து படைப்பளிகள் அனைவரையும் சேர்த்து அசிங்கப்படுத்திவிட்டது. படித்தவர்கள் பண்புள்ளவர்களாக இருப்பார்கள் என்பது எழுதுவதற்கு மட்டும்தான் போலும்.

குழிப்பணியாரம்:

விமலாதித்த மாமல்லன் தலைமையில் நடந்த இலக்கியக் கூட்டத்தில் (கேண்டீனில்தான்) நான். கேபிள், நரேன், கவிராஜன், ரோசா வசந்த், லக்கி, அதிஷா, ஜெயராஜ் பாண்டியன் அனைவ்ரும் மாமல்லனின் பேச்சில் மயங்கியதை பார்த்ததும், மாமல்லன் அனைவருக்கும் குழிப்பணியாரம் வாங்கித்தருவதாக அடம்பிடித்தார். ஆனால் கேண்டீனில் மாவு தீர்ந்ததால் நாங்கள் தப்பித்தோம். மாமல்லனை தன் கேமராவால் விதவிதமாக சுட்டுத்தள்ளினார் ஜெயராஜ் பாண்டியன். அதில் ஒரு போட்டோவில் மாமல்லன் வெடிச்சிரிப்புடன் அபாரமாக இருந்தார். விரைவில் பேஸ்புக்கில் வரும்.

சண்டை: 2

இரவு 9 மணிக்குமேல் நண்பர்கள் ஜெயராஜ் பாண்டியன், நரேன், கேபிளுடன் ஆற்காடு மெஸ்சுக்கு சாப்பிடப்போனோம், உனவு முடித்ததும் ஜெயராஜ் பாண்டியன் கிளம்பிவிட்டார். அதன்பிறகு நான். நரேன், கேபிள் மூவரும் இந்திய சினிமாவை புரட்டிப்போடப்போகும் மூன்று திரைக்கதைகளை அலசிக்கொண்டிருந்தோம்.

இரவு பதினோரு மணிக்கு மேல் எங்களை ஒரு இருபது வயதுப் பையன் முழுப்போதையில் தள்ளாடியவாறு கடந்துபோனான். ஆற்காடு சாலையில் வந்து கொண்டிருந்த வாகனங்களுக்கு ஒரு தற்காலிக வேகத்தடையாக இருந்தான். அவன் சாலையை கவனிக்காமல் தன் மொபைலில் யாருடைய நம்பரையோ தேடிக்கொண்டிருந்தபோது பில்ராத் போகும் சாலை வழியாக வந்த ஆட்டோ ஒன்று குடிமகனை உரசிக்கொண்டு திரும்பியது. அப்போதும் தன் மொபைலில் தீவிரத்தேடலில் இருந்தவனை ஆட்டோ ஓட்டுனர் சென்னையின் பிரத்யோக கெட்ட வார்த்தையில் திட்டவே, குடிமகன் பதிலுக்கு திட்ட, குடிமகனின் ஒல்லி தேகம் ஆட்டோ ஓட்டுனருக்கு ஒரு நம்பிக்கையை வரவைத்து ஆட்டோவை நிறுத்திவிட்டு குடிமகனை ஒரு அறை விட, போதை குடிமகனையும் உசுப்பிவிட இருவரும் சாலையில் கட்டிப்புரண்டபோது, சண்டையை அருகில் இருந்தவர்கள் பிரித்துவிட்டனர். ஆனால் இருவரின் செல்போனும் கானாமல் போயின. குடிமகன் செல்போனை கேபிள் எடுத்துக்கொடுத்தார். ஆட்டோக்காரன் செல்போன் கானாமல் போய்விட்டது. ஆட்டோக்காரன் தன்னுடைய கேமாரா மொபைல் தொலைந்த துக்கத்தில் புலம்பிக்கொண்டிருந்தபோது குடிமகன் ஆட்டோக்காரனிடம் வந்து மண்ணிப்புக் கேட்டான். காலம் கடந்த ஞானம்.

இதனால் அறியப்படும் நீதி:

இந்த இரண்டு சண்டைகளுமே நம் மக்களிடம் சகிப்புத்தன்மை என்பது எந்த அளவுக்கு கானாமல் போய்விட்டது என்பதையே காட்டுகிறது.

வாழ்க ஜனநாயகம்...

அவர்களுக்கு வீடென்று ஒன்றும் இல்லை...

2012-01-12T13:40:00.000+05:30

மழைதான் தொல்லை

வெயில்கூட பரவாயில்லை

குளிர் மோசம்

குலம் பெருக்கித்தொலைக்கிறது

திறந்தவெளியில் புணர்கையில்

உச்சம்

கூச்சம் கலைத்து

வழிச்செல்வோரை

மகிழ்வூட்டும்

தடம் மாறிய

லாரிகள்

உடல் மீதேறி

பரதேசம் அனுப்பும்

பிள்ளைகள்

பள்ளி அறியாது

ரேசன் அட்டை

மின்சாரம்

குடிநீர்

எந்த வசதியும் தேவைப்படாது

போலீஸ் அடிக்கும்

போக்கிரிகள்

எம் பெண்டுகளை

தூக்கிச்செல்வான்

அல்லா

ஜீசஸ்

கிருஷ்னா

சிவன்

இலவச உணவுக்கு மட்டுமே

அன்றாடம் வேலை

அளவற்ற குடி

தெருவோர அடுப்புச் சாப்பாடு

நவ நாகரீக மாந்தர் மத்தியில்

விலங்கு வாழ்க்கை

எப்போதும்

எங்கள் முகவரி

C/O : பிளாட்ஃபார்ம்..

உயிர்ப்பிக்கும் காதல்...

2012-01-11T14:28:00.000+05:30

பிரிவின்

கடைசி வினாடிகளில்

கண்களில் கொஞ்சமாக நீர்

மழை நீங்கிய

நகரமொன்றின்

ஈரச்சாலைகளில்

அக்கண்ணீர்

ஒரு நதியை உருவாக்கும்

முயற்சியை கைவிட்டு

மவுனமாய்

இயல்பு நிலை திரும்புகிறது..

பயோடேட்டா - நக்கீரன் "கோபால்”

2012-01-10T13:12:00.000+05:30

பெயர் : நக்கீரன் "கோபால்”

இயற்பெயர் : ஆர்.கோபால்

தலைவர் : நக்கீரன் குழுமம்
துணைத் தலைவர் : தி.மு.க கொ.ப.செ
மேலும்

துணைத் தலைவர்கள் : காமராஜ், ஜெகத், மற்றும்

சிங்கள ஆதரவாளர்கள்

வயது : அரசில்வாதியாக மாறும் வயது

தொழில் : பணம் பன்னுவது

பலம் : நடுநிலை வார இதழ் என்பதை இன்னும் நம்பும்
ஏமாளி வாசகர்கள்

பலவீனம் : என்னதான் பில்டப் செஞ்சாலும் கொண்டை

தெரிந்து போவது
நீண்ட கால சாதனைகள் : வீரப்பன் கேசட்டுகள்

சமீபத்திய சாதனைகள் : மீண்டும் பரபரப்பு (மாட்டுக்கறி மாமி)

நீண்ட கால எரிச்சல் : வால்டர் தேவாரம், ஜெ. ஜெ..

சமீபத்திய எரிச்சல் : சவுக்கு
மக்கள் : மஞ்சள் பத்திரிகை படிப்பவர்கள்
சொத்து மதிப்பு : இன்னும் சில தினங்களில் தமிழக
லஞ்ச ஒழிப்பு போலிசாரால் வெளியிடப்படலாம்

நண்பர்கள் : முன்பு மனித உரிமை பேசுவோர்,இப்போது

உடன்பிறப்புகள்

எதிரிகள் : என்றென்றும் ஜெ..
ஆசை : அரசியல்வாதியாக
நிராசை : பத்திரிகையாளர்

பாராட்டுக்குரியது :ஜெயலலிதாவை எதிர்த்தது

பயம் :அம்மாவின் ஆட்சி

கோபம் : ஈழ ஆதரவு முகத்திரையை கிழித்தவர்கள் மீது
காணாமல் போனவை : நெற்றிக்கண்ணை திறப்பினும்
குற்றம் குற்றமே

புதியவை :(அநீதி கண்டு ) இரண்டு கண்களையும் மூடினால்

செல்வம் கொட்டுமே
கருத்து : மீசைய பெரிசா வளர்த்தது தப்பில்ல ஆசையையும்

வளத்ததுதான்........
டிஸ்கி : தன்நெஞ்சு அறிவது பொய்யற்க!

நான் ஏன் போராளியாகவில்லை?...

2012-01-08T12:50:00.003+05:30

ஒரு போராளியாய்
மாற முடியாது என்னால்
நான்
எனது குடும்பம்
எனது சந்தோசம்
எனது தலைவன்
இப்படியாக
ஏகப்பட்ட
”எனது”க்களுக்காக
வாழவேண்டிய நிர்ப்பந்தம் எனக்கு
எம் தலைவர்கள்
குறைந்தது இரண்டு மனைவிகளை உடையவர்கள்
எனது கடவுள்களும்
எனது வழிகாட்டிகளும் அப்படித்தான்
என் தலைவர்களைப் போலவே
ரகசிய ஆசைகளும்
வாரிசுகளின் வாழ்வும்
எனக்கு முக்கியம்
மேலும்
எனது ஜாதி
எனது ஊர்
எனது மாநிலம்
எனது மொழி
எனது....
எனது ....
இப்படியாக
மேலும் பலப்பல
”எனது”க்களுக்காகவும்
நான் வாழவேண்டியிருக்கிறது
ஆகவே
என்னால்
ஒரு போராளியாக மாறவே முடியாது
மாறாக
அவர்களை
பாராட்டவோ
திட்டவோ
அல்லது
அவர்களின் தியாகத்தை வைத்து
ஆதாயம் தேடவோ
பழகிக்கொண்டுவிட்டதாலும்
என்னால்
ஒரு போதும் போராளியாக
மாறவே முடியாது..
மாறவே முடியாது ...

மாறவே முடியாது ....

தெர்மக்கோல் தேவதைகள்...

2012-01-07T10:37:00.001+05:30

கேபிள் சங்கர் என்கிற சங்கர் நாராயண் எழுதி “உ”பதிப்பகத்தால் வெளியிடப்படும் அவரின் ஐந்தாவது புத்தகம் இது. சங்கர் நாரயணுக்கு என்று ஒரு ராசி உண்டு. அவரின் இரண்டாவது புத்தகமான “சினிமா வியாபாரம்” மற்றும் “கொத்து பரோட்டா” தவிர்த்து மற்ற மூன்று ப்த்தகங்களான “லெமன் ட்ரீயும் இரண்டு ஷட் டக்கீலாவும்” நாகரதனா பதிப்பகத்துக்கு முதல் புத்தகம், “மீண்டும் ஒரு காதல் கதை” எங்களின் “ழ” பதிப்பகத்துக்கு முதல் புத்தகம். இப்போது இவரின் “தெர்மக்கோல் தேவதைகள்” உலகநாதனின் “உ” பதிப்பகத்துக்கு முதல் புத்தகம்.

இப்படி முதல் புத்தகமாக சங்கர் நாராயணின் புத்தகத்தை வெளியிட்டதில் இதுவரை யாரும் புத்தக விற்பனைக்காக சிரமப்பட்டதே இல்லை. காரனம் சங்கரின் வாசகர்கள் தொடர்ந்து எங்களுக்கு ஆதரவு தந்து வருகிறார்கள். எங்கள் “ழ” பதிப்பக நிறுவனர் ஓ.ஆர்.பி.ராஜா “கொத்து பரோட்டாவை” புத்தகமாக வெளியிடலாம் என்று சங்கரை கேட்டபோது அவர் முடியாது என மறுத்துவிட்டார். ஆனால், ராஜா பிடிவாதமாக அதனை வெளிக்கொண்டு வந்தார். இப்போது கைவசம் ”கொத்து பரொட்டாவை” மற்ற புத்தகங்கள்தான் இருக்கிறது. ஈரோடு சென்றபோது நண்பர் கார்த்திகை பாண்டியனை சந்தித்தபோது ஒரு தகவலை சொன்னார். சென்னை வந்த அவர் நண்பர் வாங்கிவந்த புத்தகங்களில் “கொத்து பரோட்டாவும்” இருந்ததாக, அவரின் நண்பருக்கு கேபிளையும், அவரது வலைப்பக்கத்தையும் பரிட்சயம் இல்லை. ஆனாலும் அவர் “கொத்து பரொட்டாவை” வாங்கி வந்ததாக சொன்னார்.

கேபிளின் கதைகளுக்கு முதல் ரசிகன் நானும், நண்பர் ”விந்தைமனிதன்” ராஜாராமனும்தான். காரனம் அவரின் பெரும்பாலான கதைகளை எழுதுவதற்கு முன்பே எங்களிடம் சொல்லியிருக்கிறார். அவரின் எல்லா கதைகளும் உண்மையான சம்பவங்களின் அடிப்படையில் எழுதப்பட்டவை. அவரின் மற்றும் அவரின் நண்பர்களின் அனுபவங்களை கதைகளாக்குவதில் சமர்த்தர். ஒவ்வொரு கதைக்கும் அதில் வரும் ஒருசில இடங்கள்தான் அவரின் கற்பனையாக இருக்கும். அந்த கற்பனைதான் கதைக்கு முக்கியமான திருப்பத்தை தரும்.

”தெர்மக்கோல் தேவதைகள்” தொகுப்பில் மொத்தம் பதினெட்டு சிறுகதைகள் இருக்கிறது. முதல் கதையில் ஒரு உதவி இயக்குனரின் பார்வையில் நகர்கிறது. சினிமா உலகத்தில் இவரும் ஒருவராக இருப்பதால் சுயஎள்ளல் மிக நன்றாக வருகிறது. இப்படி ஒவ்வொரு கதையாக கேபிள் நம்மை இன்னொரு உலகத்திற்க்குள் அழைத்துச்செல்கிறார். இவரின் கதைகளில் வரும் பெண்களைப்பற்றி தனி ஆய்வே செய்யலாம். நுணுக்கமான பெண்களின் உலகிற்க்குள் இவர் அந்த பெண்களின் மனநிலையோடு கதைகளை விவரிக்கிறார்.

தெர்மக்கோல் எப்போதும் உள்ளிருக்கும் தன்மையை அதன் இயல்பிலேயே வைத்திருக்கும், அது வெப்பமோ, குளிர்ச்சியோ எதுவாக இருந்தாலும் அதன் தன்மை மாறாமல் காப்பாற்றும். அதேபோல் வெளியில் இருக்கும் வெப்ப மாறுதல்களை உள்ளே அனுமதிக்காது. அதேபோல்தான் இவரின் கதைகளில் வரும் பெண்மக்களும் தங்கள் இயல்புகளில் உறுதியாக இருக்கிறார்கள். இதற்கு மேல் ஒவ்வொரு கதையாக நான் விவரிப்பதைவிட வாங்கிப் படித்து நீங்களே திரு.சங்கர் நாராயணிடம் உங்கள் அனுபவங்களை சொல்லுங்கள்.

மிக அருமையான கதைகள், மிக அருமையான தொகுப்பு அவசியம் படித்து, மற்றவர்களுக்கும் பரிந்துரை செய்யவேண்டிய புத்தகம்.

இவரின் புத்தகங்கள் அனைத்தும் புத்தகக் கண்காட்சியில் கிடைக்கிறது..

தெர்மக்கோல் தேவதைகள்

விலை : ரூ.50

வெளியீடு: “உ” பதிப்பகம்

அதன் விபரங்கள் :

அரங்கு எண் : 160,161 ராஜகுமாரி பப்ளிகேஷன்ஸ்

அரங்கு எண் : 334 டிஸ்கவரி புக் பேலஸ்

அரங்கு எண் : 281,282 வனிதா பதிப்பகம்

இந்த அரங்குகளில் எங்களின் “ழ” பதிப்பகம், மற்றும் உலகநாதனின் “உ” பதிப்பக வெளியீடுகளும் கிடைக்கும்

35 வது சென்னை புத்தகக் கண்காட்சி, முதல் நாள்...

2012-01-06T13:04:00.002+05:30

நேற்று 05.01.2012 மாலை 5 மணிக்கு சென்னையில் 35 வது புத்தகக் கண்காட்சி இனிதே துவங்கியது. வார நாட்களில் தினமும் மாலை 3 மணிக்கு துவங்கி இரவு 9 மணிக்கு நிறைவடையும். வார இறுதி நாட்களான சனி, ஞாயிறுகளில் காலை 11 மணிக்கு துவங்கி இரவு 9 மணிக்கு நிறைவடையும். மொத்தம் 682 அரங்குகள் உள்ளன. தமிழ், ஆங்கிலம், இந்தி, தெலுங்கு,ஃப்ரென்ச் மொழிகளில் புத்தகங்கள் கிடைக்கும். நுழைவுக் கட்டணம் பெரியவ்ர்களுக்கு ரூ.5 ம், 12 வயதுக்கு கீழ் உள்ளவர்களுக்கு இலவச அனுமதியும். அனைத்து புத்தகங்களுக்கும் 10% விலைக்கழிவு தருகிறார்கள்.

புத்தகக் கண்காட்சியில் பிளாஸ்டிக் பைகளுக்கு தடைவிதித்து இருப்பதால் வீட்டில் இருந்தே தேவையான பைகளை எடுத்துச்செல்லுங்கள். மேலும் பல நல்ல ஆலோசனைகளை நண்பர் சிராஜ் வழங்கியிருக்கிறார். அவசியம் படித்து பின்பற்றுங்கள்..

சென்னை புத்தகக் கண்காட்சி - பயனுள்ள வகையில் பயன்படுத்த சில டிப்ஸ்....

எங்கள் “ழ” பதிப்பக ம்ற்றும் உலகநாதனின் “உ” பதிப்பக புத்தகங்கள் அனைத்தும் கிடைக்கும் இடங்கள்..

1. அரங்கு எண் : 161,162, ராஜகுமாரி பப்ளிகேஷன்

2. அரங்கு எண் : 334 டிஸ்கவரி புக் பேலஸ்

மாலை ஆறு மணிவாக்கில் அரங்குக்குள் நுழைந்தபோது பைக் கட்டணமாக ரூ.10 கேட்டார்கள். ஆனால் முதல்நாள் மட்டும் அரங்கினுள் நுழைய இலவசமாய் அனுமதித்தார்கள். புத்தக கண்காட்சிக்கு வருபவர்களுக்கு, வாகனங்களுக்கு கட்டணம் விதிப்பது சரியான செயல் இல்லை. பபாசி தொடர்ந்து இந்த தவறை செய்கிறது.

அடுத்து நேற்று கூட்டம் அவ்வளவாக இல்லை. பதிவர்கள் லக்கி, அதிஷா இருவரும் முன்னமே வந்து அரங்கத்தை சுற்றிவந்தனர், அதன்பின் கேபிள் வந்தார். மேலும் பபஷா, கே.வி.ஆர், ராஜகோபால் ,தினேஷ், சங்கர், மயில் ஆகியோரும் வந்திருந்தனர். பபாஷா & கோ லயன் காமிக்ஸ் தொகுப்பை வாங்கியிருந்தனர், அவர்களின் உதவியால் மீனாட்சி புத்தக நிலையத்தில் ( அரங்கு எண் : 422) சுஜாதாவின் அத்தனை புத்தகங்களையும் சல்லிசாக வாங்க முடிந்தது. சுஜாதாவின் புத்தகங்கள் இதற்கு அடுத்தபடியாக விசா பதிப்பகத்தால் குறைந்த விலைக்கு விற்கப்படுகிறது. என்னுடைய பசங்களுக்காக கொஞ்சம் புத்தகங்கள் வாங்கினேன். மயில் சு.வெங்கடேசனின் ”காவல் கோட்டம்” புத்தகத்தை வாங்கினார். தமிழினி காவல் கோட்டம் புத்தகம் வாங்குபவர்களுக்கு ஒரு இலக்கியவாதி ஜோல்னாப் பையை வழங்குகிறது.

நேற்று நிறைய கடைகளில் புத்தகங்கள் அப்போதுதான் வந்து இறங்கத்தொடங்கின. சாப்பாட்டுக்கடைகளும் அவ்வளவாக திறக்கப்படவில்லை நான்கு போண்டா ரூ. 50 க்கு விற்பதாக நண்பர் சொன்னார். கேபிளுடன் பேசிக்கொண்டிருந்தபோது அவர் நண்பர் தன்னுடைய கவிதைப் புத்தகங்களை அன்பளிப்பாக கொடுத்தார். வரும் சனியன்று நாகரத்த்னா பதிப்பகம் சார்பாக ஒரு கவிதை புத்தகம் வெளியிட இருக்கிறார். எனவே இனி அவர் நிறைய எண்டர் கவிதைகள் எழுதி உங்களை என்கவுண்டர் செய்யும் வாய்ப்பு இருக்கிறது.

கிழக்கு இந்தமுறை தனது அரங்கங்களை தனித்தனியாக வைத்திருக்கிறது. இந்தவருடம் அவர்கள் சில புத்தகங்களை மட்டுமே வெளியிட்டதால் அங்கு கூட்டம் குறைவே. உயிர்மையில் ஓரளவு கூட்டம் இருந்தது. இந்தவருடம் உயிர்மையில் நான் வாங்கவேண்டிய புத்தகங்களின் பட்டியல் அதிகம்., கீழைக்காற்று இம்முறை அதிக புத்தகங்களை வைத்திருக்கிறது, குழந்தைகளுக்கான புத்தகங்கள் அதிகம் இருக்கிறது. இம்முறை சி.டிக்கள் விற்பனையும் வந்திருக்கிறது. அதிகம் கல்வி சம்பந்தமான சி.டிக்கள்தான், ஹாலிவுட் படங்களும் கிடைக்கிறது..

விழியிலே மலர்ந்தது உயிரிலே கலந்தது ...

2012-01-06T00:05:00.000+05:30

காதல்

நம் பதின்மத்துக்குள்

ஒரு அழையா விருந்தாளியென

நுழைந்துவிடுகிறது

பின்

நம் மன வீட்டின் கதவுகளை

நீக்கிவிட்டு

அங்கே

ஒரு வளரும் கல்லறையாக

மாறிவிடுகிறது

வணங்கவும்

பூஜிக்கவும்

வையவும்

நம்மை கட்டாயப்படுத்தும்

அக் காதல்

ரகசியதிலிருந்து தன்னை

காமமாக விடுவித்துக்கொள்கிறது

அவசியம் மறைக்கவேண்டிய

உறுப்புகளை

ரகசியமாக தடவியும்

அந்தரத்தில் புணர்ந்தும்

தன்னை தீவிரப்படுத்தும்

அதே காதல்

ஒரு அன்பில்

புணர்தலில்

நிராகரிப்பில்

இன்னொரு ஆத்மாவை

நம்முள் நுழைக்கிறது

அது

வாரிசுகளை உருவாக்கி

தன் வம்சத்தை பெருக்குகிறது

ஒரு அழையா விருந்தாளியாக

நுழைந்த காதல்

உறுப்புகள் துவண்ட நாளில்

நம் மன வீட்டின் அத்தனை சுவர்களையும்

உடைத்துக்கொண்டு

ஒவ்வொரு பெரிசுகளின்

வாய் வழியாக

வண்டை வண்டையாக

இடம் மாறி

தன் இருப்பை

நிலை நிருத்துகிறது..

அறிவுப் புரட்சி செய்...

2012-01-05T00:05:00.003+05:30

ஒன்றுபடுவோம்

போராடுவோம்

வெற்றிபெறுவோம்

புரட்சியின் விதிகள்

வரையறுக்கப்படாதவை..

எல்லா இடங்களிலும்

நசுக்கப்படும் மக்களுக்காக புரட்சி

பின்

நசுக்கப்படும் புரட்சி ..

மறுக்கப்பட்ட நீதிக்காக புரட்சி

புரட்சி செய்து ஆட்சியை பிடிப்பவனுக்கு

பிடிக்காத வார்த்தை
புரட்சி..

கடவுள், பக்தன்

முதலாளி, தொழிலாளி

அரசு, மக்கள்

எப்போதும் லாபம்

தரகர்களுக்கு மட்டும் ..

எல்லா வயிறும் எரியும்

ஏழைக்கு பட்டினியாலும்

பணக்காரனுக்கு அஜீரனத்தாலும் ..

உன் குடும்பத்தின்

பட்டினி போக்கிப்

பின்

வீதிக்கு வா

போராடு

சிறை செல்

மரித்துப் போ
மாவீரன் என

சுவரொட்டியில் சிரி..

சே

மாவோ

லெனின்

மார்க்ஸ்

பெரியார்

கொள்கைகளை வீதியில் முழங்கு

குல தெய்வத்துக்கு

கெடா வெட்டு ..

இனி

ஆயுதம் துணை வராது

அரசாயுதம் அழிக்கும் உன்னை

அறிவுப் புரட்சி செய்

அனுதினமும் தொழில் செய்

பங்கெடுப்பவனுக்கும்

பங்கு கொடு ..

புரட்சி என்பது
மாற்றத்தைக் கொண்டு வர

முதலில் நீ மாறு...

நான் கெட்டவன்...

2012-01-04T00:03:00.000+05:30

"உ" பதிப்பக நிறுவனர் திரு.உலகநாதனின் மூன்றாவது படைப்பாக வந்திருக்கும் "நான் கெட்டவன்" இரண்டு குறுநாவல்களையும், பத்து சிறுகதைகளையும் உள்ளடக்கியது. இதில் நான் கெட்டவன் என்கிற குறுநாவல் ஒரு அருமையான குறும்படத்திற்கான கதை. கதையின் முடிவில் ஒரு பிரபலமான எழுத்தாளனுக்கு நேரும் முடிவு அதிர்ச்சி அளிக்கிறது. அதாவது தன் இளைய வயது சம்பவங்களால் தன்னை கெட்டவன் என ஒரு பொதுவான பேட்டியில் சொல்லப்போய் அது அவன் வாழ்வில் எத்தகைய முடிவை தந்து செல்கிறது என்பதை மிகவும் விறுவிறுப்பாக எழுதியிருக்கிறார்.

"குறை ஒன்று உண்டு" எனும் இரண்டாவது குறுநாவலில் ஒரு அலுவலகம், அந்த நிறுவனத்தின் முக்கியமான டெண்டர் விசயம் எதிர் நிறுவனத்துக்கு கசியும்போது சம்பந்தப்பட்ட அலுவலர் பொறுப்பாவதும், அதனால் ஏற்படும் குளறுபடிகளும், அவன் வாழ்வில் வந்த வீணாவின் காதலும் இறுதியில் ஒரு கொலைகாரனாக மாறத்துணிந்த அவன். மனதில் இருந்த மாறாத காதலினால் என்ன முடிவு எடுக்கிறான் என்பதாக முடிகிறது. இதில் கதாநாயகனின் மனநிலையில் நாமும் இருப்பதே கதாசிரியனின் வெற்றி.

"கதிர்" இந்த சிறுகதையை முடிக்கும்போது ஒரு எதிர்பாராத அதிர்ச்சியை நமக்குள் ஏற்படுத்திவிடுகிறார்.

"கோபுவின் காதல் கதை"யில் கதையின் நாயகி தன் மனதை இருபது வருடங்கள் கழிந்தபின் வெளிக்காட்டுகிறாள். காதலில் நண்பர்கள் சொல்வதைக்கேட்டு அவசரப்படக்கூடாது என்பதை அறிவுறுத்தும் கதை. பொதுவாக நிறையபேரின் வாழ்வில் இந்தக் காதல் கடந்து போயிருக்கக் கூடும்.

"சாரிங்க எனக்கு வேற வழி தெரியல" அசத்தலான முடிவுடன் கூடிய இந்தக் கதை. ஒரு அடியாளின் மனநிலையை படம் பிடித்துக் காட்டுகிறது.

"முனுசாமி சிரித்தான்" சற்றே பெரிய கதை இது, ஏழ்மைக்கும், பணக்காரத்தனத்துக்கும் உள்ள இடைவெளியில் நகரும் கதை. ஒரு சாதாரண குடிசைவாசியான முனுசாமி தன் கோபத்தை வெளிக்காட்டும் விதம் பொதுவானது. முடிவு நல்ல வெடிச் சிரிப்பு...

"அமுதா" கல்கியில் வெளிவந்த இந்த கதையின் நாயகன் நிச்சயமாய் உலகநாதன்தான் என்பதை முதல் பாராவில் அவரே மறைமுகமாக ஒத்துக்கொள்கிறார். காதலுக்கு நிறம் ஒரு தடையாக நின்றபோது வாழ்வே துயரமாக மாறிய ஒரு பெண்ணின் கதை.

"சவால்" வறுமை நிறைந்த ஒரு எழுத்தாளனின் கதை. கடைசியில் வறுமையே ஜெயிக்கிறது.

"சேகர் அண்ணா" தன் வாழ்நாள் முழுவதும் திருமணம் ஆகாமலே இருப்பதற்கு தன் சித்திதான் காரணம் என்றாலும், தன் நேர்மையை விட்டுக்கொடுக்காத சேகர் அண்ணா மிக உயர்ந்து நிற்கிறார்.

"மரண தண்டனை" ஒரு நல்ல திரைக்கதை ஆனால் நீதிபதியின் தீர்ப்புக்கான காரணம் சரியாக இல்லை. கதாசிரியனின் பார்வையில் சேகர் நியாயமாக காட்டப்பட்டாலும், இந்தக் கதை முழுமையாக இல்லை.

"ராஜன்" இந்தக் கதையும் ராஜனையும் அவன் காதலையும் சுற்றி நகர்ந்தாலும் விதி தன்னை ஒரு உயர் அதிகாரியாகவும், ராஜனை ஒரு டாக்சி டிரைவராகவும் மாற்றிவிட்டது என சொன்னவிதம் அருமை.

"வீடு" ஒரு ஏழையின் சொந்த வீட்டுக்கனவையும் அது நிஜமாகியபோது அவரிடம் இருந்து பறிபோகும் அந்த வீடு அவர்க்கும், அவர் குடும்பத்துக்கும் என்னவிதமான முடிவை தருகிறது என்பதே கதை. மிக நீண்ட நேரம் இந்தக் கதையில் என்னை விடுவிக்கமுடியவில்லை. இந்த தொகுப்பிலேயே மிகச்சிறந்த சிறுகதை இதுதான்.

பாராட்டுக்கள் உலகநாதன்..

புத்தம்: "நான் கெட்டவன் "

விலை: ரூ. 70

வெளியிட்டோர் : "உ" பதிப்பகம்

புத்தகம் டிஸ்கவரி புக் பேலசிலும், புத்தக கண்காட்சியில் டிஸ்கவரி புக் பேலசின் பிரத்யோக விற்பனை அரங்கிலும் கிடைக்கிறது.

கல்வி உதவி...

2012-01-03T11:20:00.002+05:30

அனைவருக்கும் வணக்கம்,

சகோதரி ஆமினாவிடம் இருந்து வந்த மின்மடலை இங்கு பகிர்கிறேன்:
(மெட்ராஸ்பவன் சிவக்குமார் அவர்களின் வேண்டுகோளுக்கு இனங்கி)

சென்னை,வடபழனியில் ஒரு துணி கடையில் வேலை செய்து வரும் ஷாஹுல் ஹமீது எனும் சகோதரர் பல சிரமங்களுக்கு மத்தியில் தன்னுடைய மகனை பி.இ முதலாம் ஆண்டு படிக்கவைத்து வருகிறார், அவர் தற்போது கல்லூரி கட்டணம் கட்ட சிரமப்பட்டுக் கொண்டிருப்பதால் சகோதரர்கள் தங்களால் இயன்ற உதவியை செய்யுமாறு கேட்டுக் கொள்கிறோம்.

தொடர்புக்கு:

ஷாஹுல் ஹமீது,

தொலை பேசி: +91-9092813371

....................................................................

மேலும் விவரங்கள்(படங்களை க்ளிக் செய்து பார்க்கவும்):

நண்பர்கள் விரும்பினால் தங்கள் வலைப்பூக்களில் இச்செய்தியை பகிரவும். நன்றி.

தயவு செய்து உங்கள் உதவிகளை சம்பந்தபட்ட ஷாஹுல் ஹமீது அவர்களை தொடர்புகொண்டு நேரிடையாக செய்ய வேண்டுகோள் வைக்கிறேன்..

விமர்சனம்...

2012-01-03T00:09:00.008+05:30

இந்த வார்த்தையே சினிமா விமர்சனத்தை மட்டுமே பொதுவாக குறிப்பதாக அனைவராலும் நம்பும் அளவுக்கு மாறிவிட்டது. நம் பார்வைகள் குறித்த பதிவுகளாகவும், பரிமாறல்களாகவும், எதிர்க் கருத்துகளாகவும் பார்க்கப்படும் விமர்சனங்கள், தனி மனித பார்வைகளாக இருந்தாலும் அவை சமுதாயத்தின் பார்வையே. பொதுவாக படைப்பாளிகள் தங்கள் படைப்புகளை மக்களிடம் முன்வைக்கும்போது தன்னுடைய படைப்புக்கான அங்கீகாரத்தையும், பாராட்டுக்களையும் மட்டுமே எதிர்பார்க்கிறான். வெகு சிலரே தன்னுடைய படைப்புகளுக்கான எதிர்மறை விமர்சனங்களை ஏற்றுக்கொண்டு பதிலளிக்கிறார்கள், அல்லது தங்களது அடுத்த படைப்புகளை சரிசெய்து கொள்கிறார்கள். தமிழ் கூறும் நல்லுலகில் இப்போது இணையவழியே சுலபமாக தங்கள் எழுத்தை பார்க்கும் பலரும் அதிகப்படியாக மொக்கைகளாக எழுதித்தள்ளுகிறார்கள். இதற்கு காரணம் அவர்கள் அனைவருமே புத்தகங்களை வாசிக்கும் பழக்கத்தை கொண்டிருக்காததுதான். மிகுதியான வாசிப்புதான் நம்மிடம் இருந்து தரமான படைப்புகளை வெளிக்கொண்டுவரும். ஆனால் நாம் நூல் நிலையங்களில் சென்றுகூட படிப்பது இல்லை.

தமிழின் முக்கியமான படைப்புகளை, வரலாறுகளை, எழுத்துலக ஜாம்பாவன்களை அறிய முனைவது இல்லை. இங்கே யாவருக்கும் மிகச்சுலபமாக வருவது கவிதைதான். அதிலும் புதுக்கவிதை என்று ஒரு வஸ்து வந்தபின் "ஏ மனிதா!..." என்று ஆரம்பிக்கும் சமூக விழிப்புணர்வு கவிஞர்கள் முதல் "உன் பார்வை என்ன சுனாமியா?" என்று எழுதும் காதல் கவிஞர்கள் வரை சரமாரியாக எழுதித் தள்ளுகிறார்கள். கேபிளின் "எண்டர் கவிதைகள்" உருவான விதம் அறிந்தால் நீங்கள் அனைவரும் எங்களின் மீது கொலைவெறி கொண்டு பாயக்கூடும். இவ்வாறாக தன் எழுத்துத் திறமையை உலகுக்கு அறியவைத்து தன்னைத்தானே பாராட்டி மகிழும் பதிவர்களை கண்டு உண்மையில் ஆச்சர்யம் அடைகிறேன். ஏனெனில் இந்தக் கொலைவெறி கவிஞர்களில் நானும் ஒருவனே என்பதை மிகுந்த தன்னடக்கத்துடன், கூச்சம் மிகுதியாகி சொல்லிக்'கொல்'கிறேன்.

பழைய இலக்கியங்கள், அல்லது கு.ப.ரா. புதுமைபித்தன், ப.சிங்காரம், ஜெயகாந்தன், அசோகமித்ரன். இந்திராபார்த்தசாரதி, கி.ரா போன்றவர்களின் படைப்புகளை படிக்க முடியாவிட்டாலும் சுஜாதா, பாலகுமாரன் அல்லது சாரு, ஜெமோ, வாமுகோமு, தமிழ்மகன், பாரா புத்தகங்களை வாசித்தால் கூட எழுத்தின் மீதான ஈர்ப்பு அதிகரித்து நல்ல கதைகளையோ, கட்டுரைகளையோ தரமுடியும், கவிதை எழுதுபவர்கள் அவசியம் மனுஷ்யபுத்திரனை படியுங்கள். இப்போது கவிதை எழுதும் எத்தனை பேர் பாரதியை படித்திருப்பீர்கள்?

பலமுறை யுவகிருஷ்ணா பதிவுகளை ஒன்றரை நிமிசத்துக்குள் படிக்கும் அளவுக்கு எழுதுங்கள் என்று சொல்லுவார். என்னைப்போல ஆட்களுக்குத்தான் அதன் நிஜம் தெரியும். காரணம் அனைத்து பதிவுகளையும் படிக்கிற ஆள் நான். நம்ம ஆளுங்க ஒரு பதிவாவது உருப்படியா எழுதமாட்டங்களா? என்கிற ஆதங்கத்தில் தொடர்ந்து ஒருத்தர் விடாமல் படிப்பேன். ஆனால் முதல் பாராவை தாண்டமுடியாத அளவுக்கு இருக்கிறது பெரும்பாலோரின் எழுத்துக்கள். என்னைவிட அப்துல்லாதான் ரொம்ப பாவம். அவர் எனக்கு முன்பிருந்தே பல வருடங்களாக எல்லோரின் பதிவுகளையும் படிப்பவர். அத்தனைபேரின் பதிவுகளையும் படித்துவிட்டு இதற்குமேல் தானும் எழுதினால் தானும் இந்தக்கூட்டத்தில் ஒருவனாகி விடக்கூடும் என்ற கவலையால் தன் பிளாக்கை ஒரு அடையாளத்துக்காக விட்டுவைத்திருக்கிறார்.

ஆகவே நண்பர்களே இந்த விமர்சனத்தையும், ஏற்றுக்கொள்வதோ அல்லது காறித்துப்புவதோ உங்களின் உரிமை என்பதால், உங்களின் விமர்சனத்தை( நீ என்ன எழுதிருக்கேன்னு புரியலை என்பவர்கள் தவிர்க்கவும்) சொல்லிவிட்டுப் போகும்படி வேண்டி வணங்கி(ஹெ..ஹெ) கேட்டுக்கொள்கிறேன்.

லாண்டரி குறிப்புகள்...

2012-01-02T11:41:00.002+05:30

விகடனில் சுஜாதாவின் "கற்றதும், பெற்றதும்" மிகப்பிரபலமான ஒன்று. மனுஷ்யபுத்திரன் முதல் ஏகப்பட்ட அறிமுகங்கள் சுவாரஸ்யமான தகவல்கள் என சுஜாதா ஒரு பல்நோக்கு அல்லது பல்துறை வல்லுனராக கொடுத்த தகவல்கள், நகைச்சுவைகள், சினிமா விருதுகள் என மிகப்பிரபலமான பகுதி அது. அதன்பிறகு அதை ஒட்டி இணையத்திலும் அதே மாதிரியான வாரத்தொகுப்புகளை முன்னால் பிரபலங்கள் சிலர் துவங்கவே அதில் இன்றளவும் கேபிளின் "கொத்து பரோட்டா" முன்னிலை வகிக்கிறது. பெரும்பாலான வாசக(கி)ர்கள் கொத்து பரோட்டாவின் அடல்ட் கார்னர் ரசிகர்கள், ஏன் நீ இல்லையா? எனக் கேட்பவர்களுக்கு சாரி அதெல்லாம் ரொம்ப பழசு:)))

சுஜாதவை இலக்கியவாதியாக ஒத்துக்கொள்ளாத சிலர் சுஜாதா எதை எழுதினாலும் பத்திரிகைகளில் போடுவார்கள். இன்னமும் அவரின் வண்ணான் குறிப்புகளைத்தான் போடவில்லை என நக்கலடிக்கவே, சாவி ஒருநாள் அதனையும் வெளியிட்டார். ஆனால் அதிலும் வாத்யார் சுவாரஸ்யமாகவே எழுதியிருந்தார். இப்போது இணையத்தில் தேடியபோது அந்தக்குறிப்புகள் கிடைக்கவில்லை.

நமது நரேன் என்று அழைக்கப்படும் முன்னாள் வலையுலக பிரபலம் "உருப்படாதது" என்ற பெயரில் வலைப்பக்கம் வைத்திருக்கும் இவர், தற்போது காலக்கூத்து என்ற பெயரில் எழுதுகிறார். இவர் எழுதிய "கருப்பு பணம்" இந்திய அளவில், ஏன் உலக அளவில் நடமாடும் கருப்பு பணத்தின் வெளுப்பான பக்கங்களை உங்களுக்கு காட்டக்கூடியது. நிதித்துறை புலியான இவர்தான் எனக்கும் நிதி ஆலோசகர். இவர் கட்டுரை.காமில் எழுதும் "லாண்டரி குறிப்புகள்" எனக்கு மறுபடியும் வாத்யாரை நினைவுக்கு வரவைக்கிறது, அதே நக்கலும், நையாண்டியும், தகவல்களுமாய் வாத்யார் விட்ட இடத்தை தொடருகிறார்.

நானும் நாட்டு நடப்பு என்ற தலைப்பில் இதுபோல ஒன்றை முயற்சி செய்தேன். ஆனால் அந்த மாதிரியான ஜோக்குகளை சேர்க்காததால் பிரபலம் அடையவில்லை என நினைத்தேன். ஆனால் ரசிக்கிற மாதிரி எழுதவில்லை என லாண்டரி குறிப்புகள் படித்தபின்தான் எனக்கு புரிந்தது. ஆனால் என்ன இன்னொருமுறை உங்களை வதைக்க முடிவு செய்யலாம் என்றிருக்கிறேன்.

அடுத்து இணைய இதழ்களில் மே முதல் சிறகு.காம் வந்துகொண்டு இருக்கிறது. இந்த இதழில் அசத்தலான கட்டுரைகளுடன் கூடங்குளம் போராட்டக் களத்தின் நாயகன் உதயகுமாரின் நேர்காணலுடன் வந்திருக்கிறது. அவசியம் படியுங்கள்.

எச்சரிக்கை : உடான்ஸ் நட்சத்திர பதிவராக என்னை இந்தவாரம் கேபிள் அறிவித்திருக்கிறார். எனவே ஒருவாரம் உங்களை தொடர்ந்து தொந்தரவு செய்யவேண்டியிருக்கும்.

ஒரு துயரப்பாடலின் இறுதி வரிகள்...

2011-12-31T12:24:00.000+05:30

வருடத்தின்

இறுதி நாள் புனிதமானது

அது

மறு நாளைய துவக்கமாக இருந்தாலும்

புதிய

வருடத்தின் மகிழ்ச்சியை சுமந்து வருகிறது

எல்லோரும்

இந்த வருடத்தைவிடவும்

வரும் வருடம்

இன்னும் சிறப்பாக வாழ

ஆசைப்படுகிறோம்

அவ்வண்ணமே

அனைவரையும் வாழ்த்தவும் செய்கிறோம்

மதுச்சாலைகளில்

ஆலயங்களில்

சபதங்களும், இலட்சியங்களும்

நிரம்பி வழியும்

வருடத்தின் இறுதி மணித்துளிகள்

இன்னும் சில மணிகளில்

நம் அருகே வந்து

நம்மை கடந்து போகக்கூடும்

எல்லா வருடங்களின்

இறுதி நாட்களில் செய்வதைப்போலவே

சபதங்கள்

இலட்சியங்கள்

மனதின் டையரில் எழுதப்பட்டு

படிக்கப்படாது தூசிபடிந்துவிடுகிறது

எனக்கும் உண்டு

ஆசைகளும், இன்னபிறவும்

முதல் நாளுக்கு முதல் நாள்

முன்பே

இலவச குறுஞ்செய்திகளை அனுப்பி

வாழ்த்துகளை வாரி வழங்கும்

வள்ளல்களால்

கூவிக்கொண்டிருக்கும்

என் செல்பேசி

எப்போதும் நினைவுபடுத்திக் கொண்டேயிருக்கிறது

மீதமிருக்கும் நண்பர்களை

ஆனாலும்

ஒரு துயரப்படலின் இறுதி வரிகளைப்போல

விடிந்துகொண்டுதான் இருக்கிறது

யாவருக்கும் பொதுவாக

ஒவ்வொரு இரவும்..

நீ...

2011-12-27T15:42:00.000+05:30

எப்போதும்

எனக்கு என்ன பிடிக்கும்

பிடிக்காது என்பது அனைத்தையும்

பார்த்து பார்த்து செய்பவள் நீ

தினமும்

நள்ளிரவு தாண்டி போதையில்

கதவு தட்டும் என் இம்சையை

எனது வக்கற்றத்தனத்தை

என் ரசனையை

வீட்டில் இருக்கும்போதெல்லாம்

உன்னுடன்

ஒரு வார்த்தைகூட பேசாமல்

தோழிகளிடம் செல்போனில்

மணிக்கணக்கில் அரட்டை அடிக்கும்

என் அயோக்கியத்தனத்தை

இன்னும் ஏராளமான என் இம்சைகளை

பொறுத்துக்கொண்டு

இப்போது நம்

பிள்ளைகளையும் சேர்த்து

எங்கள் மூவரையும் சுற்றி

இயங்குகிற உன் உலகில்

உனக்கு என்ன பிடிக்கும் என

உனது முப்பத்தி இரண்டாவது

பிறந்தநாளின் முதல்நாள் அன்று

முதன்முறையாக கேட்டபோது

உங்களைத்தான்

அப்புறம்

இப்போது நம் குழந்தைகளையும் சேர்த்து

என்றாய் சிரித்துக்கொண்டே..

பேரறிவும், பெருந்துயரும்...

2011-12-26T14:46:00.002+05:30

அந்தக் குற்றப்பத்திரிக்கை

அவர்கள் விருப்பம்போல் புனையப்பட்டிருந்தன

நீ மறுக்க மறுக்க

உன் விரல் ரேகை பதியப்பட்டு

தயாரிக்கப்படிருந்த அந்த ஆவணம்

நாளை விசாரணைக்கு ஏற்றுக்கொள்ளப்பட இருக்கிறது..

நீ குற்றத்தை ஒப்புக்கொள்ளாவிடினும்

நிரூபிக்கப்பட்டதாக முடிவு செய்யப்பட்டு

ஒருவேளை

உன்னை தூக்கிலிட

ஆணை பிறப்பிக்கப்படலாம்

உன் மரணத்திற்கான தேதிகள்

பலர் கை மாறலாம்

நிராகரிக்கவோ

ஆதரிக்கவோ

அவர்களுக்கு பல காரணங்கள் தேவையாக இருக்கிறது

ஒரு பழி வாங்கலாக

ஒரு அரசியல் ஆதாயமாக

சந்தர்ப்பங்கள் உனக்கு சாதகமாக

அல்லது

எதிராக முடிவெடுக்க வைக்கலாம்

அவர்களுக்கு தேவை

அவர்களின் நலனே

மேலும்

அவர்களின் வாரிசுகள் நலனும் அதில் அடங்குகிறது..

ஒரு உண்ணாவிரதமோ

மனிதச்சங்கிலியோ

பெருந்திரள் ஆர்ப்பாட்டமோ

உன் வாழ்நாளை நீட்டிக்க உதவலாம்

நீ

உன் சாவை எதிர்பார்த்துக் காத்திருப்பாய்

மரண நீட்டித்தல் என்பது

மரணத்தை விடவும் கொடுமையான தண்டனை என்பதை

உன்னைத் தவிர யாருக்கும் புரியாது

அவர்கள் உன் மரணத்திற்கான

தற்காலிக இடைவெளிக் கடவுள்களாக தங்களை கருதுபவர்கள்..

உன் தண்டனையை நிறைவேற்றுபவர்களுக்கு

உன் வாழ்வில் எந்த அக்கறையும் கிடையாது

தன்னைக் கடிக்காத போதிலும் ஒரு எறும்பை

நசுக்கிவிடுகிற மனப்பான்மை கொண்டவர்கள் அவர்கள்

எனவே

உன்னை தூக்கிலிட கட்டளையிடுமாறு கூச்சல் போடுவார்கள்

அவர்கள் தலைவனை விடவும்

வாழும் தலைவியின் மனம் குளிர்ந்தால் போதும்

மனித இனத்தின் நீங்கா களங்கம் அவர்கள்

பக்கத்தில்

கூப்பிடும் தூரத்தில் அரங்கேறிய

கற்பழிப்புகளை,

கொலைகளை நியாயப்படுத்தியவர்கள் அவர்கள்..

இங்கு நியாயம் என்பதே வரையறைக்கு உட்பட்டதுதான்

யார் வரையறை செய்யும் அதிகாரத்தில் இருக்கிறார்கள் என்பதே முக்கியம்

எனவே

நீதி கேட்டு நெடும்பயணம் செய்து கலைத்துப்போவாள் உன் தாய்

உன் தந்தை, சகோதரி, உறவினர்

முகம் அறிந்த, அறியாத உன் நியாயம் உணர்ந்தோர்

வெகு சொற்பமே

அவர்களின் அழுகுரல்

தொலைக்காட்சி நாடகங்களால் மறைக்கப்படும்

இங்கு ஊடகங்கள் வியாபாரத்துக்கு மட்டுமே

அவைகள்

இன்று உன்னையும்

நாளை வெறொன்றையும் வைத்து பிழைப்பு நடத்தும்

முத்தமிழ் அறிஞரே மானாட, மயிலாட நடத்திப்பிழைக்கும்போது

ஊடகங்கள் உனக்கு துனைவராது..

சுமரியாதை என்பது எழுதுவதற்கு மட்டுமே

குருடாகவும், செவிடாகவும் நடிப்பவர்கள் ஆளும் தேசத்தில்

நாமெல்லாம் அடிமைகளே..

எனவே சகோதரனே

இனி நீதிக்காக போராடாதே

எல்லோரும் அம்மணமாக ஓடும்போது

உனக்கேன் கோவணம்

நிர்வாணம் பழகிக்கொள்

இருக்கவே இருக்கிறது அருமருந்தாய் டாஸ்மாக்

அரசாங்கமே நடத்துகிறது

குடித்து, களித்து வாழ்வை நகர்த்து

கொஞ்சமாக கோஷமிடவும் கற்றுக்கொள்

தி.மு.க வோ, அ.தி.மு.க வோ

காங்கிரசோ, பி.ஜே.பி யோ

அல்லது

ஏதாவது ஒரு லெட்டர்பேடு கட்சியிலாவது

உறுப்பினராக மாறு

ஒருபோதும் கம்யூனிஸ்டாக மாறிவிடாதே

அது மனதிற்கும் உடம்புக்கும் ஆகவே ஆகாது..

தமிழ் கோசம் இனி ஒன்றுக்கும் உதவாது

சமயங்களில்

உயிரும்

மயிருக்கு சமமாகப் போகும்..

காயடிக்கப்பட்டு வாழ்வதைவிட

சாவே மேலென நினைத்தால்

எழு, புறப்படு, கைதாகு

அதன்பின்

இந்தக் கவிதையின் முதல்வரியில் இருந்து

துவங்கும் உன் வரலாறு..

பயோடேட்டா - எம்.ஜி.ஆர்...

2011-12-25T00:01:00.000+05:30

பெயர் : எம்.ஜி.ஆர் அல்லது புரட்சித்தலைவர்

இயற்பெயர் : மருதூர் கோபாலமேனன் ராமச்சந்திரன்

தலைவர்                           : முன்னால் அ.தி.மு.க
துணை தலைவர்     : முன்னால் தி.மு.க
மேலும்
துணைத் தலைவர்கள்  : ரசிகர்கள் மட்டும் (ஜெ. ஜெ அல்ல)

வயது : தொப்பி, கண்ணாடியால் மறைத்தது

தொழில்    : நடிப்பது (சினிமாவில் மட்டும்)
பலம்                             : இரட்டை இலை
பலவீனம்                          : எதுவுமில்லை
நீண்ட கால சாதனைகள் :  படுத்துக்கொண்டே ஜெயித்தது

சமீபத்திய சாதனைகள் : இன்றும் மக்களின் மனதில் இருப்பது

நீண்ட கால எரிச்சல்      : அன்று கருணாநிதி இன்று ஜெ
சமீபத்திய எரிச்சல்      : வாரிசுகள் கோலோச்சும் அரசியல் அவலம்
மக்கள்                           : ஏழ்மையில் இருந்து மீளவேண்டியவர்கள்
சொத்து மதிப்பு    : மக்களின் மனதில் நிற்பவர்
நண்பர்கள்                        : யாரையும் நம்பாத குணம் கொண்டவர்
எதிரிகள்     : காணாமல் அடிக்கப்பட்டுவிட்டனர்,

ஆசை : தமிழீழம்

நிராசை : கருணாநிதியின் சுயநலம்

பாராட்டுக்குரியது : ஈழப் போராட்டத்தில் பங்கெடுத்தது
பயம்   : தாய் மூகாம்பிகை
கோபம்   : சாட்டையை சுழற்றும் அளவுக்கு
காணாமல் போனவை : ராமாவரம் தோட்டம்
புதியவை    : இன்றும் அ.தி.மு.கவை வாழவைப்பது
கருத்து   : கண்ணதாசன், வாலி, பட்டுக்கோட்டை எழுதியவை

டிஸ்கி : இன்றைக்கு கருப்பு எம்.ஜி.ஆர் என்று தன்னை

சொல்லிக்கொள்ளும் ஒருவர் குடித்துவிட்டு

பொதுமேடைகளில் உளறுவதை பார்க்கும்போது

எம்.ஜி.ஆர் பெயரை பயன்படுத்துவதை

தடைவிதிக்கலாம் போல..

பயோடேட்டா - தந்தை பெரியார் ...

2011-12-24T12:32:00.000+05:30

பெயர் : தந்தை பெரியார்

இயற்பெயர்                        : ஈ.வெ.ராமசாமி
தலைவர்                           : திராவிட மக்கள் அனைவருக்கும்
துணை தலைவர்     : ------------------
மேலும்
துணைத் தலைவர்கள்  : இப்போது இருக்கும் திராவிட காக்கைகள் அல்ல

வயது : நாத்திகத்தின் வயது

தொழில்    : அறியாமையை நீக்கிய ஆசான்
பலம்                             : நேர்மையும், துணிவும்
பலவீனம்                          : மக்களின் பலவீனம்
நீண்ட கால சாதனைகள் :  தமிழகத்தில் சாதி வேர்களை வெட்டியது

சாகும்வரை பிரச்சாரம்

சமீபத்திய சாதனைகள் : வீரமணியை வாரிசாக்கி

நாத்திகத்துக்கு குழிதோண்டியது

நீண்ட கால எரிச்சல்      : தேர்தல் அரசியல்
சமீபத்திய எரிச்சல்      : வீரமணியின் மகன் அடுத்த தலைவர்
மக்கள்                           : தன்மானத்துடன் வாழவேண்டியவர்கள்
சொத்து மதிப்பு    : பெரியார் சிந்தனைகள் மதிப்பற்றவை
நண்பர்கள்                        : காங்கிரஸ்காரனுங்க இல்லை
எதிரிகள்     : கருணாநிதி போன்ற அரசியல் நடிகர்கள், மற்றும்

பிராமணர்கள்
ஆசை   : சாதிகளை ஒழிக்க
நிராசை                           : இவரை மட்டும்தான் இன்னும் நாயக்கர் சாதியின்

தலைவராக்காமல் இருக்கும் மக்கள்

பாராட்டுக்குரியது : சுயமரியாதை இயக்கம், பகுத்தறிவு
பயம்   : அப்படின்னா?
கோபம்   : முட்டாள் திராவிடர்களின் கடவுள் பக்தி
காணாமல் போனவை : மக்களின் சிந்திக்கும் திறன்
புதியவை    : மஞ்சள் துண்டு வாரிசு
கருத்து   : அது யாரும் கேட்க, பின்பற்ற விரும்பாத வஸ்து

டிஸ்கி : கடவுளை இல்லை, கடவுள் இல்லை,

கடவுள் இல்லவே இல்லை.

கடவுளை கற்பித்தவன் அயோக்கியன்

கடவுளை நம்புகிறவன் முட்டாள்

கடவுளை பரப்புகிறவன் காட்டுமிராண்டி...

பெரியார் பற்றிய சுருக்கமான வரலாறு...

ஈ. வெ. ராமசாமி

நான் - நீ - அவன் ...

2011-12-24T00:04:00.001+05:30

நீ அப்படியே

என்னைப்போல் இருந்தவன்

ஒரு சில

மாற்றுக்கருத்துகள் தவிர்த்து

உனக்கும், எனக்கும்

நிறைய ஒற்றுமைகள் உண்டு

அவன் அப்படியல்ல

நம்மிலும் வேறானவன்

முரண்பாடுகளின் மூட்டை

உனக்கு அவனை

பிடிக்கவே பிடிக்காது

எனக்கு அப்படியல்ல

எதிராளியையும் ரசிப்பவன் நான்

அவன் நம்பிக்கைகள்

அவனுக்கு

எனது கருத்துக்கள் எனக்கு

ஆனாலும்

உனக்குப் பிடிக்காத அவனை

நான் அவனை நேசிப்பதால்

நீ

என்னையும் வெறுக்கத் துவங்குகிறாய்,

இப்படியாக

யாவருக்குமே

சிலரை சிலரால்

வெறுக்கவோ, நேசிக்கவோ

செய்யும்படி ஆகிறது..

விருதும்... விருந்தும் - ஈரோடு சங்கமம்...

2011-12-23T00:01:00.001+05:30

"ஈரோட்டில் இருந்து ஜாபர் பேசுறேன் அண்ணே, என்னைத் தெரியுதா?" என்றார்.

"வணக்கம் ஜாபர், சொல்லுங்க" என்றேன்.

"அண்ணே ஈரோடு சங்கமத்துல சில பதிவர்களை பாராட்டி கவுரவிக்கலாம் என முடிவு செய்துள்ளோம், அதில் நீங்களும் ஒருவர்!, அதனால அவசியம் வந்துடுங்க" என்றார். கூடவே " சென்னையில் இருந்து கேபிள், ஜாக்கி, லக்கி, அதிஷா வருவதாக சொல்லியிருக்கின்றனர், எனவே நீங்களும் வந்தால் சந்தோசமாக இருக்கும்" என்றார். நான் வருவதாக உறுதியளித்துவிட்டு மாலை கேபிளை சந்தித்தபோது அவர் அன்றைய தேதியில் உடான்ஸ் பரிசளிப்பு விழா இருப்பதால் தன்னால் வர இயலாது என்றார். தேதியை மாத்திக்கலாமே என்றபோது, இல்லை தலைவரே அதனை முடிவெடுக்கும் அதிகாரம் ஆதியிடமும், பரிசலிடமும் இருக்கிறது. உடான்ஸ் சார்பாக நடத்தப்படுவதால் ஜோசப் இல்லை, அதனால் நான் இருந்தே ஆகவேண்டும் என்றார்.

தம்பிகள் மெட்ராஸ்பவன் சிவக்குமார், பிலாசபி பிரபாகரன், மோகன்குமார், ஆனா மூனா செந்தில், தம்பி ரமேஷ்குமார் என சனிக்கிழமை கோவை எக்ஸ்பிரசில் வண்டியேறினோம். வழியெங்கும் கலாட்டாவுடன் ஈரோடு வந்து சேர்ந்து ஒரு டாக்சி பிடித்து ராஜராஜேஸ்வரி லாட்ஜுக்குப் போனால், அங்கு யாருமே இல்லை. அங்கிருந்து ஜாபருக்கு போன் போட்டால், அண்ணே நேராக மண்டபத்துக்கு வந்துடுங்க என்றார்.

மண்டபத்தில் அபி அப்பா, விந்தைமனிதன், வாசு அண்ணன், மணிஜி, ஜாக்கி, செல்வம், மயில், சங்கவி என சிலர் இருந்தனர். சரக்கு தந்த உற்சாகத்தில் அபிஅப்பா எனக்கு ஒரு முத்தம் தந்தார், அது பலருக்கும் தொடர்ந்தது. விந்தைமனிதன் மிக உற்சாகமாக இருந்தார். அதன்பின் எல்லோரும் சாப்பிடப்போனோம். வழக்கமாக இம்மாதிரியான நிகழ்வுகளில் மெனுப்படிதான் பரிமாறுவார்கள். ஆனால் நாம் கேட்டதெல்லாம் கிடைத்தது. இட்லி, தோசை, முட்டை தோசை, ஆம்லேட், கலக்கி என ஹோட்டலில் இருப்பதுபோன்ற உணர்வை தந்தது மிகுந்த ஆச்சர்யம். இதுக்கே ஈரோட்டுக்காரர்களுக்கு ஒரு சிறப்பு வந்தனம்.

அன்று இரவு மீண்டும் லாட்ஜ் வந்து பிரபாவும், ஆனா முனாவும் தங்கள் உற்சாக பானத்தை தொடர் விரும்பியதால், நான் தனியாக ரூம் எடுத்துக்கொண்டேன். நால்வர் தாங்கும் அறையான அதில் மோகன்குமார், சிவகுமார், ரமேஷ் ஆகியோருடன் தங்கினோம். சிறிது நேரத்தில் ஆரூரான் வந்து நீங்கள் எப்படி பணம் கொடுக்கலாம் என சண்டைபோட்டு பணத்தை திருப்பித்தந்தார். அவர் அன்பை மறுக்கமுடியாமல் பணத்தை வாங்கிக்கொண்டேன். இரவு நெடுநேரம் சங்கவி எங்களுடன் பேசிக்கொண்டு இருந்தார், நீண்ட நாள் பழகிய ஒரு நண்பருடன் பேசிய உணர்வைத் தந்தது. ஆனாலும் எதிர்பார்த்ததை விடவும் அதிகம்பேர் வருவதால் மறுநாள் நிகழ்வை சரியாக நடத்தவேண்டும் என்கிற கவலை அவரிடம் அதிகம் இருந்ததை உணர்ந்தேன். இரவே கார்த்திகை பாண்டியன், தருமி ஐயா உள்ளிட்ட மதுரை நண்பர்களும் வந்துவிட்டனர்.

மறுநாள் காலை எங்களை எழுப்பியது "வம்பை வெலைக்கு வாங்குவோம்" மணி( ஆனா ஆளு படு சாந்தம்) மற்றும் நாய் நக்ஸ் ( இந்தப் பெயருக்கு ஒரு வரலாறு இருக்காம்) வந்து எழுப்பினார், அவருடன் தமிழ்வாசி பிரகாஷ் வந்திருந்தார். நாய் நக்ஸ் நக்கீரன் சரியான ஜாலி பார்ட்டி, தன்னைப் பற்றி எதை எழுதினாலும் லிங்க் கொடுக்காமல் போடக்கூடாது என கட்டளை போட்டார். வரவேற்பு அறைக்கு வந்தபோது ஜாக்கி, உ.த அண்ணன் இறங்கிவந்தனர். பின்னால் வந்த அபி அப்பாவும், விந்தைமனிதனும் செந்தில் இப்பத்தான் ஊரில் இருந்து இப்பத்தான் வர்றீங்களா எனக்கேட்டு எங்களை அதிர்சிக்குள்ளாக்கினர்(மொதநாள் இரவு அவ்வளவு மப்பு).

காலை மண்டபத்துக்குள் நுழைந்ததும் அதிஷா,லக்கி, அரவிந்தன், சீனா ஐயா என வரிசையாக நண்பர்கள் வர ஆரம்பித்தனர். உடனே எல்லோரையும் சாப்பிட அழைத்தனர். முதல்நாள் இரவு போலவே காலையிலும் கேட்டதெல்லாம் கிடைத்தது. தாமோதர் சந்ரு, கதிர் அண்ணன், பாலாசி, சங்கவி, ஆரூரான், ஜாபர் என அனைவரும் பக்கத்தில் இருந்து உபசரித்தனர்.

அதன்பிறகு தமிழ்மண சூப்பர் ஸ்டார் சிபி.செந்திகுமார் வந்து சூறாவளியாக சுழன்று அனைத்து பதிவர்களையும் சந்தித்து புகைப்படம் எடுத்து தள்ளினார். அப்போது நான் அவரிடம் என்னை அறிமுகம் செய்துகொண்டபோது கண்டுகொள்ளாமல் நழுவினார், ஆனால் விழா முடிந்தவுடன், சாரி தலைவரே சரியா கவனிக்கலை என புகைப்படம் எடுத்துக்கொண்டார். எப்படி தலைவரே இவ்வளவு எழுதித் தள்ளுறீங்க என கேட்டதும். அண்ணே என் வீட்டில் இணைய இணைப்பு கூட இல்லை. நான் செல்போனில் பதிவு செய்து சினிமா விமர்சனம் எழுதுவாக சொன்னார்கள், ஆனால் என் செல்போனை பாருங்கள் என அரதப் பழசான நோக்கியாவை காட்டினார். அவரின் எல்லாப் புகழுக்கும் மூலகாரணம் ஜாக்கிதான் எனச்சொன்னபோது சத்தமாக சிரித்தார் # ஜெய் ஜாக்கி. மேலும் வானம்பாடிகள், பாலபாரதி, தேனம்மை, காவேரி கணேஷ், ஷர்புதீன் என அறிமுகமான பலர் வந்திருந்தனர்.

விழா துவங்கும்முன் ISR செல்வகுமாரின் "யாதுமானவள்" குறும்படம் திரையிடப்பட்டது. விழா துவங்கியதும் ஆரூரனின் சங்கமத்துக்கான ஏற்பாடுகள் பற்றிய உரை மற்றும் வரவேற்பு உரை முடிந்தபின் கதிர் சிறப்பு விருந்தினரைப் பற்றி சிறு உரை நிகழ்த்தினார். அதன்பின்பு வரிசையாக பாராட்டு பெறுபவர்கள் அழைக்கப்பட்டனர். ஒவ்வொருவரையும் அறிமுகபடுத்தும் ஆடியோ, வீடியோ தொகுப்பு சிறப்பாக வடிவமைக்கப்பட்டு இருந்தது. விருது பெறுபவர்களை பற்றி கதிரும், அருள்மொழியும் செய்தி வாசிப்பினைப் போல அறிமுகப் படுத்திய விதம் மிக சிறப்பு. இந்த AV க்காக என்னிடமும் என்னைப்பற்றிய தகவல்களும் படங்களுக்கும் கேட்டிருந்தனர், என்னைப் பற்றிய தகவல்களை மட்டும் கொஞ்சமாக அனுப்பிவிட்டு போட்டோ அனுப்பவில்லை. அதற்கு காரணம் நான் சற்று தனிமை விரும்பி அதனால் நான் மட்டும் தனியாக அல்லது மற்றவர்களுடன் விரும்பி எடுத்துக்கொண்ட புகைப்படங்கள் எதுவுமே என்னிடம் இல்லை. அதனை கதிரிடம் சொன்னதும் அவர் கண்டிப்பாக படம் தந்தே ஆகவேண்டும் என்றார். ஆனால் நான் தரவே இல்லை. ஆச்சர்யப்படுத்தும் விதமாக அவர்கள் என் படங்களை எங்கோ தேடிக் கண்டுபிடித்து ஒளி பரப்பினார்கள். என்னுடன் விருதுபெற்ற அனைவரையும் விடவும் நான் மிகச் சாதாரணமான ஆள். இந்த விருது சமூக வலைத்தளத்தில் என்னை இன்னும் சிறப்பாக பணியாற்ற ஊக்கப்படுத்தியிருக்கிறது. என்னோடு சேர்ந்து கவுரவிக்கப்பட்டவர்களின் விவரங்கள் இந்த இணைப்பில் காணலாம்.

சங்கமம்‘2011 ல் பாராட்டு பெற்ற 15 பேர்

விழா முடிந்தவுடன் மதிய உணவு பரிமாறப்பட்டது. முதலில் அசைவப்பிரியர்களுக்கான பந்தி. மிக அருமையான வீட்டு சாப்பாட்டைப்போல் இருந்தது. வழக்கமாக மிக குறைவாக சாப்பிடும் நான் ஒரு செம கட்டு கட்டினேன். அதன்பிறகு சைவ பட்சிகளுக்கு, அதிலும் நேர்த்தியான உணவு வகைகள் பரிமாறப்பட்டன. அதன்பிறகு நண்பர்களுடன் முடிந்தவரை ஒவ்வொருவராக சந்தித்து அளவளாவினேன். நான் பேச விரும்பிய கோமாளி செல்வாவை சந்திக்கமுடியாத அளவு பிசியாக இருந்தார். நம்ம தலை வாலைப் பார்த்து நான் கே.ஆர்.பி என்றவுடன் போச்சு போங்க எனக்கு அறிமுகமா? என கட்டிப்பிடித்துக்கொண்டார். தல எல்லோருடனும் மிகுந்த சுவாரஸ்யமாக பேசிக்கொண்டு இருந்தார்.

அதன்பிறகு மோகன்குமார் அண்ணன் செல்வகுமார், அன்பழகன், உ.த அண்ணன் அனைவரும் காரில் சென்றுவிட, மணிஜி,வாசு,ஜாக்கி, மயில் என அவர்களும் தங்கள் வண்டியை பூட்டினர். நான் அரவிந்தன் அண்ணன், சிவக்குமார், ஆனா முனா , பிரபாகரன் அனைவரும் ஒரு சிறு ஷாப்பிங் முடித்துவிட்டு அறைக்கு வந்து சிறு உறக்கம் முடித்து ரயிலடி வந்து ஆனா முனாவுக்கு ஒரு டிக்கெட் வாங்கிவிட்டு லைட்டாக சரக்கடிக்கலாம் என முடிவு செய்துவிட்டு வெளியில் வந்தால், அங்கு ஒரு இண்டிகாவை தள்ளிவிட சொல்லி ஒருவர் ரிக்வெஸ்ட்ட நாங்கள் அதனை சத்தமாக தள்ளிக்கொண்டுபோனபோது அருகில் இருந்த இட்லி கடையில் சுவாரஸ்யமாக டின்னரை லவட்டிக் கொண்டிருந்தது அபிஅப்பா, விந்தைமனிதன் & கோ. ரயிலுக்கு நேரம் குறைவாக இருந்ததால் திரும்பவந்து அவர்களை பார்க்கலாம் என கிளம்பினோம் ஆனால் திரும்பிவந்து பார்த்தபோது அவர்கள் எஸ்கேப். அதன்பிறகு பாருக்கு சென்று நான், ஆனா முனா, ரமேஷ் மூவரும் ஆளுக்கு ரெண்டு லார்ஜ் அடித்தோம், பிரபா தலைவலி என ஒதுங்கிக்கொள்ள, பக்கத்து ஓபன் ரெஸ்டாரண்டில் டின்னர் முடிந்ததும் ரயிலுக்கு நேரமாகவே, கிளம்பும் நேரத்தில் அவசரமாக தொத்திக்கொண்டோம். இரவு பத்தரைமணி வாக்கில் வாசு அண்ணன் தான் பத்திரமாக வீடு வந்ததாக குறுஞ்செய்தி அனுப்பினார். கேபிள் போனில் உடான்ஸ் விழா சிறப்பாக நடந்ததாக சொன்னார். விந்தைக்கு ஒரு போன் போட்டால் அவர் ரயில் நிலையத்தில் இருப்பதாக சொன்னார். அவருடன் இந்தமுறை சரியாக அளவளாவ முடியவில்லை.

இரவு மேல் பர்த்ததில் படுத்தவுடன் மனம் ஒரு ரிவர்ஸ் கியர் அடித்து நிகழ்ச்சியை அசைபோட்டது. கிட்டத்தட்ட 240 பேரை வரவேற்று, தங்கவைத்து, உபசரித்து நிகழ்ச்சியை சிறப்பாக நடத்திய ஈரோட்டு சகோதரர்களுக்கு என் வந்தனம். சிறப்பு அழைப்பாளர் திரு.ஸ்டாலின் குணசேகரன் அவர்கள் இந்த விழாவுக்கு வரும்வரை இதை ஒரு வழக்கமான பாராட்டு விழாவாக நினைத்ததாகவும் ஆனால் ஆடியோ, வீடியோவை பார்த்து நெகிழ்ந்ததாகவும் சொன்னார். தொடர்ந்து அனுமதிக்கட்டணம் இல்லாமல் மிகச்சிறப்பாக ஈரோட்டில் புத்தக கண்காட்சியை நடத்திவரும் சாதனையாளரான அவர் எங்களை பாராட்டியபோது. நான் என்னை இன்னும் வளர்த்துக்கொள்ளவேண்டும் என்ற உத்வேகம் எழுந்தது. ஆனால் என்னை மிகவும் கவர்ந்த ஒருவர் மகி என்கிற மகேந்திரன். இவரின் மனசு கோடியில் ஒருவருக்குத்தான் வரும். பாராட்டுக்கள் மகி.

விழாவினை மிகச்சிறப்பாக தொடர்ந்து நடத்திவரும் ஈரோடு வலைப்பதிவாளர் குழுமம் விரைவில் அறக்கட்டளையாக மாறவிருப்பதாக கதிர் அறிவித்தார். வாழ்த்துக்கள் சகோதரர்களே...

முல்லைப்பெரியாறு அணையைக் காக்க சென்னையில் ஒன்றுகூடல்...

2011-12-22T12:30:00.000+05:30

நேற்று காவிரியை மறுத்தார்கள்; இன்று முல்லைப் பெரியாறை மறுக்கிறார்கள். நாளை பாலாறு, பவானி ஆறு மறுக்கப்படும். தமிழகம் பாலையாகும்; தமிழன் தமிழ்நாட்டிலேயே அகதியாவான்.

நேற்று தமிழீழத்தில் 1.5 லட்சம் தமிழர்களும், தமிழகக் கடற்கரையோரங்களில் 543 மீனவர்களும் கொல்லப்பட்டனர். இன்று கேரளாவாழ் தமிழர்கள் தாக்கப்படுகின்றனர். நாளை தமிழகத்தில் வாழும் நாமும் தாக்கப்படலாம். நம் தமிழனைக் காக்க, தமிழர்களின் உரிமைகளை வென்றெடுக்க, நம்வாழ்வின் ஒரு மணி நேரத்தை நாம் ஒதுக்கமாட்டோமா?

நம் தமிழ் சொந்தங்களுக்காக வரும் டிசம்பர் 25 ஞாயிறு அன்று மெரீனா கடற்கரையில், நீதி கேட்ட கண்ணகி சிலை அருகே மாலை 3 மணிக்கு ஒன்று கூடுவோம். கம்பம், போடி, தேனி மக்களுக்காக துணை நிற்போம்..

இந்தப் பதிவினை அனைவரும் தங்களின் வலைப்பக்கத்தில் வெளியிடுமாறு வேண்டுகோள் வைக்கிறேன்,,,

இயக்கமொன்றை எப்படி ஆரம்பிக்கலாம் - டெரெக் சிவேர்ஸ்

2011-12-21T12:14:00.000+05:30

கழிவிரக்கம்...

2011-12-20T11:23:00.000+05:30

ஆற்றாமையாகத்தானிருக்கும்
எனக்கு..

கையேந்தும் பெரியோர்களை
சிறு பிள்ளைகளை
பெண்களை பார்க்கும்போதெல்லாம்
கடவுளை கொன்றுபோட..

அரசுப் பேரூந்தின் நடத்துனர்கள்
ஏழை வயசாளிகளை
ஒருமையில் விளிக்கும்போது
என்ன மனித நேயமென..

புலிகள் இல்லாதொழிக்கப்பட்ட
பின்னும்
முகாம்களில் தவிக்கும்
சகோதரங்களை நினைத்து
புத்தனும் செத்துப் போனான் என..

தெரு வண்டி வியாபாரியிடம்
பத்து ரூபாய்க்கு கை நீட்டும்
போலீஸ்காரன் நிலை நினைத்து
இதுவா கடமை? என..

கடவுளை

இனம்பிரித்து வணங்கும்

காட்டுமிராண்டிகளை நினைத்து

அறிவு வளர்ச்சி இதுவாவென..

ஓட்டுக்கு காசு வாங்கி

தேர்தல் முடிந்தபின்னர்

ஐயோகோ

ஆட்சி சரியில்லை எனும்

மக்களை நினைத்து

உன் உரிமை இதுவா என..

தெரு நாய்களைப்போலத்தான்

வாழ்கிறோம்

ஆயினும்

கவுரவத்துக்கு ஒன்றும்

குறைச்சல் இல்லை..

அரசியல் பேசலாம் வாங்க...

2011-12-17T10:23:00.000+05:30

சின்ன வயசுல கிராமத்து வாழ்க்கைல விவரம் அதிகம் தெரியாதபோது அப்பா காங்கிரஸ்காரர் என்பதால் எனக்கும் இந்திராகாந்தி, மற்றும் காங்கிரஸ் கூட்டணியில் இருந்ததால் எம்.ஜி.ஆர் இருவரின் மேல் பிரியம் அதிகம். எங்கள் ஊருக்கு கலைஞர், எம்.ஜி.ஆர், ஜெயலலிதா என அரசியல் தலைவர்கள் வருகை புரிந்திருக்கிறார்கள். கலைஞர் தனது "நெஞ்சுக்கு நீதி" புத்தகத்தில் அவரின் ஆரம்பகால அரசியல் வாழ்க்கையின்போது எங்கள் ஊருக்கு வந்தபோது, எனது அம்மா வழி தாத்தா சாமியார் என்கிற ஜெகதீச தேவர் பணம் தந்து உதவியதாக குறிப்பிட்டு இருக்கிறார்.

ஆரம்பத்தில் காங்கிரஸ் கட்சியினரின் ஆதிக்கம் நிறைந்த எங்கள் ஊர், திராவிட இயக்கங்கள் வளர ஆரம்பித்தபின் தி.மு.க அதிகமாகவும் பின்னர் எம்.ஜி.ஆர் பிரிந்தபின்னர் அ.தி.மு.க அதிகமாகவும் மாறிவிட்டது. அப்போதெல்லாம் பொதுக்கூட்டங்கள் அடிக்கடி நடக்கும் தி.மு.க கூட்டங்கள்தான் பெரும்பாலும் களைகட்டும் பெரும்பாலும் நாகூர் ஹனீபா கச்சேரியோடு துவங்கும் கூட்டம், நாகூர் ஹனீபாவின் கணீர்க்குரலில் "கள்ளக்குடி கொண்ட கருணாநிதி வாழ்கவே" என பாட்டு கேட்க ஆரம்பித்ததுமே கூட்டம் உற்சாகமாகிவிடும். ஆனாலும் நன்னிலம் நடராசன், வெற்றிகொண்டான் போன்றோர்தான் கலைஞரை விடவும் ஸ்டார் பேச்சாளர்களாக வலம் வந்தனர். செந்தமிழ் அவர்கள் நாவினிலிருந்து பச்சை பச்சையாய் கொட்டும். எனக்குத் தெரிந்தவரை அவர்களைவிடவும் அசிங்கமாய் ஒரு சமயம் நாஞ்சில் சம்பத் பேசக் கேட்டிருக்கிறேன். இப்படிப்பட்ட கூட்டங்களினால் ஈர்க்கப்பட்டு நானும் ஜனதா கட்சியை சார்ந்து பஞ்சாயத்து தலைவர் பதவிக்கு அணில் சின்னத்தில் போட்டியிட்ட வல்லத்தரசு மாமாவை அதிக வாக்குகள் வித்தியாசத்தில் தோற்றுபோக உதவியிருக்கிறேன். மைக் கிடைத்த சந்தோசத்தில் நோட்டீசில் கொடுக்காத வாக்குறுதிகளை நானே கொடுத்து மக்களை மாற்றி ஓட்டுப் போடவைக்க காரணமாக இருந்திருக்கிறேன்.

எங்கள் ஊரில் குடுமபத்தலைவர் சொல்லும் கட்சிக்குதான் மொத்த குடும்பமே ஓட்டுப்போடவேண்டும். ஆனாலும் கட்சிக்கு ஒருத்தர் என குடும்பத்தில் அண்ணன் தம்பிகள் பிரித்து வைத்துக்கொண்டு வெட்டு குத்து ஆன சம்பவங்களும் நிறைய நடந்திருக்கின்றன. போலிஸ் நிலையத்தில் வைத்தே கொலை செய்யும் அளவுக்கு முட்டாள்கள் நிறைந்த என் ஊரில் அரசியல் அடிதடிகள் இப்போதெல்லாம் நடப்பது இல்லை. சமீப காலமாக சீமானுக்கும், விஜயகாந்துக்கும் நிறையபேர் அதிலும் முப்பது வயதுக்கு கீழே இருக்கும் வெட்டிப்பசங்க ப்ளெக்ஸ் வைத்திருப்பதை பார்க்க முடிந்தது. ரஜினி ரசிகர் மன்றத்தினர் விஜயகாந்த் கட்சிக்கு மாறிவிட்டனர். கேப்டன் கட்சி ஆட்களைப் பொறுத்தவரை அவர்கள் அனைவரும் தங்கள் தலைவனைப்போலவே பகல் குடிகாரர்களாக இருப்பதன் பொறுத்தம் ஆச்சர்யம் அளிக்கவில்லை. ஆனால் தமிழ் உணர்வுகள் நிறைந்த இளைஞர்கள்தான் சீமானை ஆதரிக்கிறார்கள்.

இப்போது தி.மு.க, அதி.மு.க வுக்கு இளைஞர்கள் அதிகம் போவது இல்லை. தி.மு.க வை பொறுத்தவரை அது ஒரு தனியார் நிறுவனம். முதலாளிக்கு சேவகம் செய்யும் பண்ணையாட்களாய் இருந்தால் மட்டுமே அங்கு இருக்க முடியும். தலைவர் முதல் மாவட்ட, நகர செயலாளர்வரை வாரிசுகள் கோலோச்சும் மன்னர் வம்சம் அது. அ.தி.மு.க வோ அடிமைகள் மட்டுமே இருக்க முடிகிற கட்சி. அங்குள்ள மந்திரிகளுக்கே பதவி அந்தரத்தில் ஊசல் ஆடுகிறது. இதில் தொண்டன் நிலை படுமோசம். எங்கள் பகுதியில் சசிகலாவின் தம்பி திவாகரன்தான் எல்லாம். கட்சிக்காரர்கள் அனைவரும் அவரை "பாஸ்" என்றுதான் அழைக்கிறார்கள். ஒரு காலத்தில் சிவானந்தா பட்டறையில் நண்பர்கள் படைசூழ அரட்டை கச்சேரி நடத்திக்கொண்டிருப்பார். இப்போது திருவாரூர் மாவட்டத்தின் கல்வித் தந்தையாகிவிட்டார்.

இவருக்கு போட்டியாக களம் இறங்கியிருக்கிறார் டி.ஆர்.பாலுவின் புதல்வர் டி.ஆர்.பி.ராஜா இவர் இன்னொரு கல்வித் தந்தை. சென்ற ஒரு வருடத்தில் மட்டும் ஐநூறு ஏக்கர் நிலம் வாங்கியிருப்பதாக சொல்கிறார்கள். தற்போதைய மன்னார்குடி சட்டமன்ற உறுப்பினராக இருக்கும் இவர் இன்னொரு பியர் பாக்டரி ஆரம்பிக்கும் முயற்சியில் இருக்கிறார். 'குடி'மகன்கள் வாழ்த்தட்டும்.

இதனால் இப்போது கேப்டன் கட்சிக்கு தாவும் இளைஞர்கள் அதிகரிக்க ஆரம்பித்திருக்கின்றனர். கேப்டனும், அவரின் மனைவி, மச்சானோடு இன்னொரு தனியார் நிறுவனமாகவே அவர் கட்சியையும் நடத்திவருகிறார் என்பதை அறியாமல் அவர்தான் நாளைய விடிவெள்ளி என பேசுபவர்களை சுந்தர தெலுங்கில் திட்டுவதைவிட வேறு வழியில்லை. ஒரு காலத்தில் கம்யூனிஸ்டுகள் கோலோச்சிக்கொண்டிருந்த ஒருங்கிணைந்த நாகப்பட்டினம் மாவட்டம் இப்போது மாறிவிட்டது. காரணம் கம்யூனிஸ்டுகளின் பக்கபலமே அங்கிருக்கும் தலித் கூலித்தொழிலாளிகள்தான் அவர்களும் திருமாவளவன் பக்கம் பெரும்பாலும் திசைமாறிவிட்டதால் இப்போது அங்கிருக்கும் ஆதிக்கசாதி (அதாங்க நாங்கதான்) கம்யூனிஸ்ட் தலைவர்கள் மட்டும்தான் இருக்கிறார்கள். தலித்துகளில் இருக்கும் பெரும்பாலான இளைஞர்படை கேப்டன் கொடி பறக்கவிட ஆரம்பித்து இருப்பதாகவும் சொல்கிறார்கள்.

பி.ஜெ.பி யை திருவாரூர் மாவட்டத்தில் வளர்த்த முன்னோடிகளில் நானும் ஒருவன், அந்த கட்சி நன்றாக வளர்ந்து இல.கணேசன் எனும் பார்ப்பன பண்ணையாரால் குழிதோண்டி புதைக்கப்பட்டுவிட்டது. இனி மத்தியில் பி.ஜெ.பி ஆட்சி ஒருவேளை வந்தால் பதவி பெருமைக்காக புதியதாக யாராவது சேரக்கூடும். இப்படியான அரசியல் நிகழ்வில் இப்போதெல்லாம் ஒரு வார்டு உறுப்பினராக போட்டியிடவே மூன்று லட்சமும், பஞ்சாயத்து தலைவராக போட்டியிட இருபது லட்சமும் செலவு செய்கிறார்கள். ஏன் இவ்வளவு செலவு செய்கிறீர்கள் என்று கேட்டால் நூறு நாள் வேலை திட்டத்திலேயே செலவு பண்ணதை அள்ளிரலாம், மத்ததெல்லாம் லாபம்தான் என்கிறார்கள். இந்தமுறை சட்டமன்ற தேர்தலில் தி.மு.க சென்னையில் போட்டியிடாமல் ஒதுங்கிய காரணமே அவர்கள் கட்சியின் வார்டு மெம்பர்கள்தான் காரணம் என்று நண்பர் சொன்னார். முன்னால் மேயர் மா.சு அவர்கள் எளிமையாய் எடுத்த நற்பெயரை வார்டு மெம்பர்கள் கெடுத்துவிட்டதாக நண்பர் சொன்னார்.

இப்படி முதல் போட்டு சம்பாதிக்கும் தொழிலாக அரசியல் மாறிவிட்டபின் மக்களை நினைத்தால் பாவமாக இருக்கிறது. மின்சாரம் இல்லையா? பொறுத்துக்கொள்கிறோம். பெட்ரோல் உயர்வா அதையும் பொறுத்துக்கொள்கிறோம், பக்கத்து மாநிலத்தான் தண்ணி தரவில்லையா அதனையும் பொறுத்துக்கொள்கிறோம். என பொறுத்துப் போக பழகிவிட்டனர். "பொறுத்தார் பூமி ஆள்வது" அந்தக்காலம். இப்போது "பூமி ஆள்வோரால் மக்கள் பொறுத்தார்" ஆகிவிட்டனர். இதில் மன்மோகன் சிங், சோனியா, அத்வானி, அன்னா அசாரே போன்ற காமெடியன்களை பார்க்கும்போது மக்களாட்சி இனி வாய்ப்பே இல்லை என்றுதான் தோன்றுகிறது.

வாழ்க ஜனநாயம்...

"பெண்கள்"...

2011-12-16T12:49:00.000+05:30

ஆண்களுக்கு, பெண்கள் எப்போதும் எந்த சூழ்நிலையிலும் வசீகரமானவர்கள். ஆனால் பெண்களுக்கு, ஆண்கள் அப்படியல்ல பெரும்பாலும் அடிமைகளாகத்தான் பாவிப்பார்கள். அதாவது அடங்கிப்போகிற மாதிரி ஆளுமைக்கு மாறுவது. மிகச்சுலபமாக வரும். அவர்களின் கண்ணீர் சாதிக்க முடியாததையும் சாதித்துக்கொடுத்துவிடும். பாட்டியாக, அம்மாவாக, மனைவியாக, சகோதரிகளாக, தோழிகளாக, மகளாக எல்லா வடிவங்களிலுமே பெண்கள், ஆண்களை அரசாளப் பிறந்தவர்கள். ராகுல சாங்கிருத்யாயனின் "வால்காவிலிருந்து கங்கைவரை" படிப்பதற்கு முன்பாக நானும் பெண்களை ஆராதிக்கும் ஒரு சமகால ஆணாகவே இருந்தேன். என் காதல்களும் அப்படியானதுதான். நான்கு மூத்த சகோதரிகளுக்குப் பிறகு ஒரு அண்ணனும் அதன்பிறகாக நான் கடைக்குட்டியாக பிறந்ததால் அண்ணன் வரம் வாங்கி வந்தவனாகவும் நான் போனசாக கிடைத்தவனாகவும் கொண்டாடப்பட்டதில் நான்கு வயதுவரைக்கும் எனது நீண்ட முடிக்கு சடைபின்னி என்னையும் ஒரு சகோதரியாக பார்த்த என் அக்காள்களின் மனப்பான்மையே பிற்காலத்தில் என்னை பெண்களிடம் இருந்து தூரமாக வைத்தமைக்கு ஒரு காரணமாக இருக்கலாம்.

பொதுவாகவே என் காதல் தோழி கீதாஞ்சலி இறந்தபிறகு பெண்களுடனான எனது சிநேகம் இப்போதைய மலையாளிகள் தமிழர்களை பார்ப்பதுபோல் அவ்வளவு விரோதமாக இருந்தது. அதிலும் நண்பர்களுடன் பேங்காக் சென்று தங்கியபோது தங்கும் அறைகள் போதாமால் என் அறைக்குள் நண்பன் ஒருவன் அவன் இன்ஸ்டன்ட் காதலியை அழைத்துவந்து சல்லாபித்துக்கொண்டிருந்தான். வெளியில் பெய்த பேய் மழை நான் அந்த முக்கல், முனகலை காதில் வாங்காமல் பார்த்துக்கொண்டதால், அறைக்கு வெளியே தாய்லாந்தின் சோம பானத்தில் திளைத்துக் களித்துக்கொண்டிருந்தபோது பின்னால் இருந்து வந்து கட்டிப்பிடித்தாள் ஒரு குட்டி. முழுவதுமாய் போதை ஆக்கிரமித்திருந்த அவள் மூளைக்கு அவளின் நிர்வாணம் அறியப்படாது போகவே அந்த திறந்த வராண்டாவில் என்னை வீழ்த்த நினைத்த அவளை செவுளில் ஓங்கி அறைந்தேன். தாய்லாந்தில் பெண்களை அதிலும், காமம் தின்பதற்கு கூட்டி வந்த அழகிகளை அடித்தால் நம்மை வெட்டி நெருப்பில் வாட்டி தங்களின் போதைக்கு சைட் டிஷாக ஆக்கிக் கொள்வார்கள் தாய்லாந்து மாமாக்கள். அவளுக்கு நான் விட்ட அறையால் போதை ஒரு கோப இடைவெளியை அவளுக்குத் தரவே கத்தி கூப்பாடு போட்டாள். நல்ல வேளையாக மழையால் வீட்டுக்குப்போகாமல் காத்திருந்த என் தாய்லாந்து நண்பன் ஓடி வந்தான். அவன் அவளை விசாரித்துவிட்டு அவன் பங்க்குக்கு ஒரு அறை விட்டான். அவனுக்கு என்னைப்பத்தி தெரியும். நான் எப்போது பேங்காக் போனாலும் என் பயண நிரல்களை அவன்தான் பார்த்துக்கொள்வான். நான் அங்கு எப்போதும் அங்குள்ள பெண்களை தொட்டது கிடையாது. சோமபானம் மட்டும்தாம், அதிலும் வித விதமான சோமபானங்களையும், அங்கு பிரத்யோகமாக கிடைக்கும் உயிரின அவியல்களையும், வறுவல்களையும் விரும்புகிறவன். என்னோடு உடன் வருகிற நண்பர்களுக்கு மட்டும்தான் அழகிகள். கீதாஞ்சலியின் மரணத்துக்குப் பின் மற்ற பெண்கள் அனைவரும் எனக்கு ஒரு சக உயிரினம் மட்டுமே.

இணையத்திற்குள் வந்துவிட்ட பின் ஆரம்பக் காலங்களில் கிடைத்த தோழிகளும் என பண்றே?, என்ன சாப்பிட்டே?, இப்ப என்ன கலர்ல டிரெஸ் போட்டுருக்கே என தேச வளர்ச்சிக்கான கேள்விகளை சலிக்காமல் கேட்டு என்னை கதற விட்டதால் மொத்தமாகவே ஒரு பெரிய கும்பிடாக நெடுஞ்சாண்கிடையாக கம்பியூட்டர் முன் விழுந்து வணங்கி யாருடனும் பேசக்கூடாது என தீர்மானம் இயற்றிவிட்டேன். இதில் சாட்டில் வரும் ஆண்களும் விதிவிலக்கல்ல கேள்விகள்தான் மாறும், அவிங்கலுக்கு சரக்கு போடப் போகலியா?, என்ன படம் பார்த்தே?, நீயும் வினவு ஆளா?, கேபிளோடு டெய்லி எப்புடி தண்ணி அடிக்க நேரம் கிடைக்குது? மாதிரியானதும் இன்னும் சில சிக்கலான பெண்கள் பற்றிய கேள்விகளுமாக இருக்கும். அதனால் இணைய அரட்டைக்கு நான் முகமூடி(invisible) அணிந்து வந்தாலும் கண்டுபிடித்து கூப்பிடும் சிலர்வரை யார் வந்தாலும் பின்கால் பிடரியில்பட ஓடத்துங்கிவிடுவேன்.

ஆனால் நம்ம ஆட்கள் சுவாரஸ்யமானவர்கள் பெண்கள் பெயரில் யார் வந்தாலும், அவர் என்ன வயதாக இருந்தாலும் உடனே அங்கு சென்று சலாம் வைத்து அவர்கள் வீட்டு நாய்குட்டியாக மாற விண்ணப்பம் அனுப்புவார்கள். அப்புறம் சாட்டில் வழியும் ஜொள்ளு எதிர்முனை கணினியை மூழ்கடிக்க ஆரம்பித்து இவனும் போதையில் செல்போனில் ஸ்பீக்கரில் பேசி தன் பெருமையை நிலை நாட்டத்துவங்கும் நேரத்தில் அது ஊரெங்கும் பற்றி எரியும். உடனே இணைய நாட்டாமைகள் தங்கள் சொம்புகளுடன்(ஒரிஜினல் சரவணா ஸ்டோர் சொம்புகளுக்கு மட்டும்தான் அனுமதியே) வந்து பிரச்சினையை பெரித்தாக்க, அந்த பெண்களின் கணவன்மார்களின் நிலைதான் தில்லாலங்கடியாக மாறும். அவனும் ஒவ்வொரு மொபைல் அழைப்புகளாக நோண்ட ஆரம்பித்து கணவர்கள் மாறும் அளவுக்கு போகும். இது ஒரு சிறிய உதாரணம் என்றாலும். இம்மாதிரியான அதாவது சாரு மாதிரியான புனித ஆத்மாக்கள் செய்யும் விசயங்களால் ஒட்டுமொத்தமாக நன்றாகவே எழுதும் பெண்கள் கூட சில காலங்களுக்குள் எழுதுவதை நிறுத்திவிட்டு சமையல் குறிப்புகளுக்கு மாறிவிடுகிறார்கள். எழுதுவதில்கூட நாம் அவர்களை அடுக்களை தாண்டி வெளியேவர விடுவதில்லை.

"நீ ஏன் எப்போதும் பெண்களை மட்டமாகவே நினைக்கிறாய்!" என்பார் எனது சிங்கப்பூர் தோழி. "நான் உன்னை எப்போதாவது குறைத்துப் பேசியிருக்கேனா?" என்றால், இல்லை என்பாள். "பொதுவாகவே பெண்களுக்கு ஆண்கள் தங்களை ஒரு படி மேலே உயர்த்திப் பார்க்கவேண்டும் என்பதுதான் உங்களின் இயற்கை குணம். அதற்காகத்தான் இத்தனை அலங்காரமும். ஆனால் பெண்களை என் சக மனிதர்களாக பார்ப்பவன் நான். அதனால்தான் தாலி கட்டாத சுயமரியாதை திருமணம் செய்தேன் எனபது உனக்கும் தெரியுமே!, மேலும் என் மனைவிக்கும் நான் அலுவல் நிமித்தம் சந்திக்கும் பெண்களுக்கும் நான் அளிக்கும் மரியாதையும் உனக்கு தெரியும்!!. அப்புறம் ஏன் கேட்க்கிறாய்" என்றபோது, "இல்லைப்பா பொதுவாகவே நீ ஏன் பெண்களை சகோதரி என அழைக்கிறாய்? அதனால்தான் கேட்டேன்" என்றாள். உண்மைதான் பதின்ம வயதில் ஏற்பட்ட பாலியல் தொடர்புகள் வீட்டுக்கு தெரிய ஆரம்பித்தபோது, எனது தயார் என்னை அழைத்து "தம்பி நீ சிகிரெட் பிடிக்கிறே அது உன் உடம்பை மட்டும்தான் பாதிக்கும், தண்ணி அடிப்பதாக கேள்விப்பட்டேன் அது நண்பர்களையும் சேர்த்து பாதிக்கும், ஆனால் சமீபமாக பெண்கள் விசயம் பத்தி கேள்விப்பட்டேன், வேண்டாம்பா அது ரெண்டு குடுமபத்தை பாதிக்கும், அதன்பிறகு வாழ்நாள் முழுதும் நீ வருந்த வேண்டியிருக்கும்" என்றார். அதுதான் அன்றைய தினமே என்னை சிந்திக்கவைத்தது, அதுதான் இப்போதுவரை சந்திக்கும் பெண்களை சகோதரிகளாக பார்க்க வைத்தது. சகோதரி என்று சொல்லியவுடன் அவர்களுக்கு சில விஷயங்கள் தாண்டி என்னுடன் பேசுவது இல்லை. ஒரு சகோதரனாக என்னை மரியாதையான எல்லைக்குள் வைத்துப்பழக ஆரம்பித்து விடுவதால். பெண்களால் எனக்கும், என்னால் அவர்களுக்கு பிரச்சினை வருவதேயில்லை.

இன்னும் நிறைய சொல்லலாம்... இன்னொரு நாள் இன்னொரு கட்டுரையில் பேசுவோம்...

வாழ்வும்,, வாழ்வும்...

2011-12-15T13:12:00.000+05:30

நீலமும், பழுப்பும்

கலந்த நிறம் கொண்ட

மீன்கொத்திப் பறவையொன்று

நீண்ட காத்திருப்பின் முடிவில்

சரேலென

பாய்ந்து கவ்விச்சென்றது

ஒரு சிறு மீனை

குளத்தில்

திடீரென

ஒரு பறவையின் வாழ்வுக்காய்

கிளம்பிய வட்ட அலைகள்

ஒரு மீனின் வாழ்வைப்போல்

சிறியதாகி

கரையில் முடிந்தது..

பயோடேட்டா - முல்லைப் பெரியாறு ...

2011-12-14T12:26:00.000+05:30

பெயர் : முல்லைப் பெரியாறு

இயற்பெயர்                        : பெரியாறு
தலைவர்                           : ஜான் பென்னிகுயிக்
துணை தலைவர்கள்    : தமிழக அரசு மற்றும் கேரள அரசு
மேலும்
துணைத் தலைவர்கள்   : அனைத்து அரசியல்வாதிகளும் (மக்கள் அல்ல)

வயது : 117 வயது

தொழில்    : இயற்கையின் கொடை
பலம்                             : கல்லணையின் பலம்
பலவீனம்                          : மலையாளிகள்
நீண்ட கால சாதனைகள் : தேனி,திண்டுக்கல்,மதுரை ,சிவகங்கை,

ராமநாதபுரம் மக்களின் வாழ்வாதாரத்தை தந்தது

சமீபத்திய சாதனைகள்   : தமிழகத்தின் ஒற்றுமை
நீண்ட கால எரிச்சல்      : மலையாளிகளின் அயோக்கியத்தனம்
சமீபத்திய எரிச்சல்      : DAM 999, தமிழர்களை தாக்குவது
மக்கள்                           : பொறுத்தால் தண்ணீர் பெறமுடியாது

என்பதை அறியத்துவங்கியவர்கள்
சொத்து மதிப்பு    : 999 வருடம் நமக்கே சொந்தம்
நண்பர்கள்                        : கருணாநிதி ஆதரிக்கும் மத்திய அரசு அல்ல
எதிரிகள்     : எப்போதும் மலையாளிகள்
ஆசை   : அணையை உடைக்க
நிராசை                          : தமிழகத்தில் இருந்துதான் உணவுப்பொருட்கள்

வரவேண்டும் என்பதால் அவர்களின் போராட்டம்

நீண்டநாள் தாங்காது.

பாராட்டுக்குரியது : தமிழக அரசியல் கட்சிகளின் ஒற்றுமை

(இந்த விசயத்தில் மட்டும்)
பயம் : தமிழகத்தில் இருக்கும் அதிக எண்ணிக்கையிலான

  மலையாளிகள்
கோபம்   : எப்போதும் தமிழர்களின் மீது காட்ட விரும்புவது
காணாமல் போனவை   : படித்தவர்கள் அதிகம் வாழும் மாநிலம்

என்கிற பெருமை
புதியவை : படம் காட்ட முயற்சி செய்வது (DAM 999)
கருத்து : அவர்களுக்கு தண்ணீர் தேவையில்லை.

மின்சாரத்துக்குதான் இத்தனை போராட்டமும்.

அதனால் அவர்களுக்கு அதிக மின்சாரம்,

நமக்கு அதிக தண்ணீர் என்கிற கலாமின் கருத்து

ஏற்றுக்கொள்ளக்கூடியது

டிஸ்கி : மலையாளிகளின் தமிழர் துரோகம் ஈழத்தில்

துவங்கி தமிழகத்தில் வந்து நிற்கிறது. வாலை

நறுக்காவிட்டால் அவர்களுக்கு திமிர் குறையாது.

ஏன் அப்படி செய்தாள்?...

2011-12-13T14:00:00.000+05:30

எனக்கொரு காதல் இருந்தது
வெயிலடிக்கும் சித்திரை மாத
சிறு மழையென
சட்டென என் முன்
வந்தவள் அவள்..

எல்லாவற்றுக்கும்

பதில் வாங்கும்

வாதத்தில் தோற்க விரும்பாத

அழுத்தக் காரியும் கூட

அவளை

எவ்வளவு பிடிக்குமோ

அவ்வளவு

வெறுக்கவும் தோணும்..

அவள்

விரும்பும் யாவும்

நான் விரும்ப வேண்டும்
என எப்போதும் விரும்பும்
பிடிவாதக்காரி..

வெட்கப்பட்டு பார்த்ததேயில்லை..

ஒரு இரவின் மத்தியில்

அவள் அழைப்பு

எதிர்முனையில் கண்ணீர்

எப்போதும்போல இன்னொரு நாடகம்

என்பதாய்

தூக்க அயர்ச்சியில் தொடர்பை

துண்டிக்க,

மறுநாள் காலை

துயரமாய் விடிந்தது ....

முத்தமாவது ஞாபகம் இருக்கிறதா?...

2011-12-12T12:12:00.000+05:30

அந்தக் கூட்டத்தில்

நீ என்னை

சரியாக அடையாளம் கண்டுகொள்ளவில்லை

ஆனால்

மனதின் ஆழங்களில் இருந்து

என்னை தோண்டிக்கொண்டிருந்தாய்!

எனக்கு

உன்னை மிக நன்றாகத்தெரியும்

மறக்கக் கூடியவளா நீ!

மறக்க முடியுமா?

அந்த முத்தத்தை!!..

ஒரு முத்தம்

ஒரே ஒரு முத்தம்

அவசரகதியில் சுவாரஸ்ய முத்தம்

அதிரடி முத்தம்

அதிர்ந்து நீ எனை

அறைந்த முத்தம்

அத்தனை இன்பம்

அத்தனை வலி

சொல்லிவிடுவாய் என நானும்

சொல்லாமல் பயம்காட்டி நீயும்

நாட்களை கடத்திய முத்தம்

இப்போதும்

அப்படி ஒரு முத்தம்

கிடைக்காமல் போகவைத்த

முதலும் கடைசியுமான முத்தம்..

என்னைத்தான் ஞாபகம் இல்லை

அந்த

முத்தமாவது உனக்கு ஞாபகம் இருக்கா?..

இருளர்களின் நான்கு பெண்மக்கள்...

2011-12-10T00:43:00.001+05:30

பாம்புகள் விஷமானவை

நாங்கள்

அதனை மிகக்கவனமாய் கையாளுவோம்

கொடியதாக இருந்தபோதும்

அவை தீண்டினால்

பாதுகாத்துக்கொள்ளும் அறிவும்,திறனும்

எங்களிடம் நிரம்ப உண்டு..

மனிதர்களை நாங்கள் நம்புவோம்

பாம்புகளைப் போல் அல்லாமல்

மனிதர்கள் அறிவானவர்கள்

படித்தவர்கள்

எங்களுக்கு வாழ்வளிப்பவர்கள்

என்பதில் எங்களுக்கு மிகுந்த நம்பிக்கை இருந்தது..

அவர்களும் மனிதர்கள்தான்

காக்கி உடை அணிந்த

மனிதர்களின் காவலர்கள் அவர்கள்

எங்கள் பெண்கள் அப்பாவிகள்

காவலர்களின்

அம்மா

மனைவி

சகோதரி

மகளைப்போலத்தான்

எங்கள் பெண்களும்

ஆனாலும் அப்பாவிகள்..

அவர்கள்

உங்களை நம்பி வந்தார்கள்

காவலர்கள் நீங்கள்

கேவலமாக நடந்தீர்கள்

மேல்தட்டு மக்கள் என்றால்

முகம் மறைக்கும் ஊடகங்கள்

எங்கள் பெண்களை

அப்படியே காட்டினர்..

நாங்களும் உங்களைப்போலத்தான்

எங்களுக்கும்

மானமும்

சுயகவுரவமும் நிறைய உண்டு

வெறும் ஐந்து லட்சத்துக்கு

விலைபோனதாக சொல்லும்

உங்கள் அறிவிப்பில்

எங்களுக்கான நீதி

கரன்சிகளால் மறுக்கப்படுகிறது

காவலர்களுக்கும்

மனைவி உண்டு

அவர்களை ஐந்து லட்சத்துக்கு

அனுப்புவார்களா?..

நாங்கள் விலங்குகளை புரிந்துகொண்ட அளவு

இன்னும்

மனிதர்களை புரியாது வாழ்கிறோம்..

உங்கள் விசாரணைக் குழுமம்

எங்கள் பெண்களின் மானத்தை

மீட்டுத்தரப் போவதில்லை

நீங்கள் நாகரீகமானவர்கள்

நாங்கள் பாம்பாட்டிகள்..

பாம்புகள் ஒருபோதும் எங்களை

ஏமாற்றியதே இல்லை

மனிதர்கள் நீங்கள்தான்

எப்போதும் எங்களை

ஏறி மிதிக்கிறீர்கள்

ஆனால்

என்றாவது ஒருநாள்

நாங்கள் பாம்பாக மாறினால்

கேவலம் மனிதர்கள்தானே நீங்கள்

அப்போது

நீங்கள் ஓடித்தான் ஆகவேண்டும்..