ஸ்பெக்ட்ரம் மசாலா ...

 

முதலில் வருபவர்களுக்கே முன்னுரிமை என்ற ஒரு விசயமே பிரபல டிவிக்களின் தீபாவளி, பொங்கல் நாட்களில் நடத்தப்படும் பட்டி மன்றங்களுக்கு ஆட்களை வரவழைக்க இப்படித்தான் அறிவிப்பார்கள். இதனால் அறிவாலய அரங்கு நிறைந்த காட்சிகளை பார்த்த பிறகு திருவாளர் ராசாவுக்கு ஒரு புதிய ஐடியா மனதில் உதிக்க உடனே அதனை செயல்படுத்தி பார்க்கும் ஆவலில் தலப்பாவிடம் சொல்லிவைக்க உடனே ஸ்பெக்ட்ரம் விசயத்தில் அதனை பரிசோதனை செய்து பார்க்க முடிவு செய்தனர்.

அதாவது டெண்டர் விட்டால் பத்தாயிரம் கம்பெனிகள் விண்ணப்பிக்கும். பத்தாயிரம் விண்ணப்பங்களில் சரியான கம்பெனிகளை தேர்வு செய்வது என்பது மிகவும் சிரமம் என்பதால் முதலில் வருபவர்களுக்கே முன்னுரிமை என்று சொல்லிவிடலாம். அது மிகவும் சுலபம். வேலையும் எளிது என தீர்மானம் செய்துதான் அவ்வாறு டெண்டர் விட்டனர். அதன்படியே ஒதுக்கீடும் செய்யப்பட்டது. 

இப்படி செய்ததால் தரமற்ற கம்பெனிகள் சிலவற்றுக்கு ஒதுக்கி விட்டதாக சிலபேர் முனக ஆரம்பித்தனர். அதில் உண்மை இருந்தாலும் சிறிய கம்பெனிகள் முன்னுக்கு வரவேண்டும். என்கிற அரசின் நல்லெண்ணத்தை எவனாவது பாராட்டினானா? 

இதனை கபில்சிபல் மட்டும்தான் சரியாக புரிந்துகொண்டு பாராட்டியிருக்கிறார். அதாவது முதலில் வந்தவனுக்கு முன்னுரிமை என்று கொடுத்ததால் அது தரமற்ற கம்பெனிகள் என்று ஆகிவிடாது டாடா, வோடஃபோன், ரிலையன்ஸ் போன்றவை சாதாரன கம்பெனிகளா என்ன? என ஒரு சரியான வாதத்தினை முன்வைத்திருந்தார்.

எனக்கு என்னமோ இவிங்க சொன்னதுதான் சரியென்று படுகிறது. இப்படியாக மெடிக்கல் சீட்டுக்கு விண்ணப்பிக்கும் மாணவர்களுக்கும் அமுல்படுத்தினால் நன்றாக படித்தவர்கள் மட்டுமல்லாது படிக்காத மாணவர்களுக்கும் அது உதவியாக இருக்கும். இதனால் நிறைய ஏழை மாணவர்கள் டாக்டராகி எளிய மக்களுக்கும் சேவை செய்வார்கள். இப்படி முதலில் வருபவர்களில் படித்த நல்ல மாணவர்களும் இருக்கதானே செய்வார்கள்.

இப்ப சட்டசபைக்கு தேர்தல் நடக்குது இல்லையா! இதுலயும் கட்சி வேறுபாடு இல்லாமே முதலில் வந்தவர்களுக்கு முன்னுரிமை கொடுத்தால் இப்ப எந்த கட்சிக்கு எவ்வளவு சீட் கொடுக்குறது அப்படிங்கிற பிரச்சினையே வராது பாருங்க!. நம்மலப்போல ஆட்களுக்கும் சீட் கிடைச்சா நாமலும் நாலு காசு பாத்து ஸ்கார்ப்பியோ காருல போகலாம் பாருங்க!.  இப்படி முதல்ல வரும் ஆளுங்க இந்த விசயத்துலயாவது ஒரளவுக்கு தரமா வருவாங்க என்பது எவ்வளவு நிதர்சனமான உண்மை. ஏன்னா? இப்ப இருக்கிற எம்.எல்.ஏ பத்தி புதுசா வேற சொல்லனுமாக்கும். 

இப்போ நம்ம தமிழ்நாட்டு கலாச்சாரத்த எடுத்துக்கிடுங்க. தமிழ் கலாச்சாரத்தை காலங்காலமா புளிபோட்டு பளிச்சுன்னு வெளக்கிக்கிட்டு இருக்குறது தமிழ்'சீ'னிமாதான். அதுல பாருங்க ஒரு பொண்ண மொதல்ல தொட்டவன் யாரோ, அவன் அந்த பொண்ண கற்பழிச்சிருந்தாலுஞ்சரி, அவந்தான் அந்த பொண்ண கட்டணும், இல்லாட்டி கலாச்சாரம் கெட்டுப் போயிடும்னு பதினெட்டுப்பட்டி நாட்டாமையெல்லாம் சொம்ப தூக்கிக்கிட்டு வந்து பஞ்சாயத்து தீர்ப்பு சொல்லுவாங்க இல்லையா? அதே மாதிரி தமிழ்க் கலாச்சாரத்துல வந்த ராசா கலாச்சாரப்படிதானுங்களே நடந்துருக்காரு? பாழாப்போன வடநாட்டுப்பயளுவளுக்குத்தான் கலாச்சார எழவெல்லாம் தெரியலன்னா நாமளும் சேந்துக்கிட்டு அவரை திட்டுனா அதில என்ன ஞாயம் இருக்குன்னேன்?

அதேமாதிரி, இப்ப பொண்ணுபாக்க போறோம். மொதல்ல பொண்ணுபாக்க வாரவனுக்கே கட்டிக் கொடுத்துட்டா பஜ்ஜிசொஜ்ஜி, டீ செலவெல்லாம் மிச்சம் பாருங்க!

நம்மூருல நம்ம குடும்பங்களையே எடுத்துக்கிடுங்களேன். குடும்பத்துல மூத்த புள்ளைக்குத்தான் எல்லா மருவாதியும் கெடைக்கும். ஏன்னா அவன் மொதல்ல பொறந்தவன் இல்லையா? கொள்ளிவெக்கிற உரிமைகூட அவனுக்குத்தான் இருக்கு இல்லையா?

இப்படியாக நாம் அடுக்கிக்கொண்டே போகலாம்.. அதனை நீங்கள் பின்னூட்டங்களில் பின்னுங்கள்...

இந்தி தேவையா என்பது பற்றிய விவாதத்திற்கு இங்கிட்டு பாருங்க "இந்தியாவா? 'இந்தி'யா வா?"