12 ஜூலை, 2011

வா! உரையாடலாம்...

அறிமுகமற்ற முகங்களுடன் 
தொடங்கியது நம் நட்பு 
நலம் விசாரித்தல் 
கொடுக்கல் வாங்கலென
விரிவான பின்னும் 
முகங்கள் ரகசியமாய் வைக்கப்பட்டிருந்தன..

குடும்பத்தின் அதீத சுமைகளை
தோள் மாற்றி சுமந்த கணங்களில்
நாம் ஒருவருள் ஒருவர் இடமாறினோம் 
வாரம்
மாதம் 
வருடமென 
வாய்ப்பளிக்காத
நாட்கள் கடந்தன..

இத்தனை எளிய 
இணைய உலகில் 
உன் முகம் காட்ட 
நீ விரும்பவில்லை 
அல்லது 
துணியவில்லை..

நேற்று முன்னிரவில் 
என் செல்பேசிவழி வந்தாய் நீ 
சென்னைக்கு வந்திருக்கிறேன் 
ரோகினி லாட்ஜ் 
அறை எண் 305
என்றாய்..

ரோகிணியின் 
305
கதவை தட்டியதும் 
திறந்த நீ சொன்னாய் 

உன் காலணிகளையும் 
முகத்தையும் 
கழட்டி வைத்துவிட்டு 
வா! உரையாடலாம்..

9 ஜூலை, 2011

கோப்பையில் மிதக்கும் நாட்கள்...

சனி இரவு 
டாஸ்மாக் உபயத்தில் 
கொரியர் நெப்போலியன் மயக்கத்தில் 
செட்டியார் மெஸ் இட்லியுடன் 
கழிகிறது..

வழி மறித்த
போலீஸ்காரனின் 
கைகளில் திணித்த 
நூறு ரூபாயுடன் 
முடிந்தது நிதி நிலைமை..

நேற்று 
அதற்கு முதல் நாள் 
அதற்கும் முதல் நாள் 
போலவே 
நாளை இரவும் கழியக்கூடும்..

இன்னொரு 
கூரியர் நெப்போலியன் 
அல்லது மேக்டவலுடன்
விந்தை மனிதனோ 
கேபிளோ 
அல்லது வேறு யாருடனோ...