உங்க நேர்மை எனக்கு பிடிச்சிருக்கு..

நேற்று மக்களவை உறுப்பினருக்கான வேட்பு மனுவை காங்கிரஸ்காரரான சுதர்சன நாச்சியப்பன் தாக்கல் செய்தார். அவருக்கான வேட்பு மனுவை கலைஞர், ஸ்டாலின் மற்றும் தி.மு.க வினருடன் சில காங்கிரஸ் ( நாச்சியப்பன் கோஷ்டி மட்டும்) ஆட்களும் சேர்ந்து தாக்கல் செய்தனர். அனைவரும் போட்டியின்றி தேர்ந்தெடுக்கப்பட்டு விட்டார்கள்.

வேட்பு மனு தாக்கலின்போது சுதர்சன நாச்சியப்பன் ஊடகங்களுக்கு பேட்டி கொடுத்தார் அதில் தமிழ்பேசும் அனைத்து மக்களுக்காகவும், தமிழ் நாட்டின் வளங்களுக்காகவும்,  தமிழர்களின் உரிமைகளுக்காகவும் அன்னை சோனியாவின் அறிவுரையின்பேரில் மக்களவையில் பேசுவேன் என்றார். என்ன ஒரு நேர்மை, 

நாச்சியப்பன் அண்ணே முதல்ல தி.மு.க காரங்க உங்க பின்னால அணிவகுத்து நின்னப்பவே தெரியும் எப்படிப்பட்ட ஜால்ரா நீங்கன்னு.. அடுத்த தமிழக காங்கிரஸ் கட்சியின் தலைவராக தேர்ந்து எடுக்கப்படும் வாய்ப்பு உங்களுக்கு இப்போதே வந்துவிட்டது. அப்படியே போய் உங்க அன்னைகிட்ட ஆசிர்வாதம் வாங்கிட்டு ராஜபக்சேயிடம் வாழ்த்து பெற்றுக் கொண்டு தமிழர்களுக்கான உரிமைகளை மக்களவையில் ஓங்கி குரலெழுப்புங்கள்..

உங்க அரசியல் குரு சிதம்பரம் ஏற்கனவே அன்னையின் அறிவுரையின்படிதான் நக்சல்களின் பிரச்சனைகளை பேசுகிறார், மன்மொஹன்ஜியும் ராகுலுக்கு கதவு திறந்து விடுகிறார். அவர்களின் நேர்மையும் எனக்கு பிடிச்சிருக்கு.

தமிழ்நாட்டில் உங்க அண்ணன் நடத்தும் செம்மொழி மாநாட்டில் வந்தும் அன்னை சோனியாவின் அறிவுரையின்படி தமிழ் பேசும் மக்களுக்காக ஒரு ஆய்வு கட்டுரை கொடுத்தால் நன்றாக இருக்கும். என்ன உங்கள் கட்டுரையில் எல்லா தலைவர்களையும் அவர்கள் தமிழுக்கு, தமிழனுக்கு செய்த சாதனைகளை நல்ல கற்பனையுடன் கூறிவிட்டு அவர்கள் அனைவரின் அறிவுரையுடன் முடிக்கும் உங்கள் ஆய்வுக் கட்டுரை அனைத்து நூலகங்களிலும் நிச்சயம் கிடைக்கும்.

நேர்மைகளின் உருவங்களே.. தமிழக காங்கிரஸ் சிங்கங்களே ... தி.மு.க வினரின் கொள்கைப்படி நடந்துகொள்ளும் நீங்கள் சீக்கரம் தமிழகத்தில் ஜெயலலிதாவோடு அல்லது விஜயகாந்தோடு சேர்ந்து காமராஜர் ஆட்சி அமைக்க வாழ்த்துகிறேன்..