பேய்களின் கதைகள் ....

நிசப்த இரவின் தனித்த பயணங்களில் 

எதிர்ப்படும் பேய்களின் கதைகள் புனிதமானவை..

துணைக்கு வரும் அவற்றின் துயரங்கள்  

கண்ணீராலும்.. ரத்தத்தாலும் எழுதப்பட்டவை..

வழியை மறிக்கும் ரத்தக் காட்டேரிகள் 

கட்டாயப் படுத்தி சொல்லப்படும் புனைவுகளில்

வீரம் மிகுந்த வரலாறு கோழைத்தனமாக ..

சுடுகாட்டில் அப்போதுதான்  சாம்பலான பிசாசுகள் 

சொந்தங்களின் துரோகம் சொல்லி ஆறுதல் தேடும்.. 

புளியமரப் பேய்களோ 

தூக்கில் தொங்கும் அவஸ்தை பற்றி 

வெளி வந்த நாக்குடன் குழறும்..

விபத்தில் மரணமுற்றவை கதைகள் 

பயங்கரமானவை

கடைசி வினாடியில் ஒரே வலி..

இப்போதும் துரத்துகின்றன 

கொலையான பேய்கள் 

செய்த பேய்களை..

கொள்ளிவாய்ப் பிசாசிடம் மட்டும் 

கவனமாய் இருங்கள் 

பிரித்தாளும் சூழ்சிகள் கொண்டவை..

எப்போதாவது அபூர்வமாய் 

தனித்த பயணத்திலோ, 

நடு நிசி கனவிலோ வரும் 

பேய்களிடம்,

சிநேகமாக இருந்து பாருங்கள்

பேய்களின் புனிதம் அறிவீர்கள்..