அபத்தங்களும், அற்புதங்களும் - தேர்தல் 2011 - பகுதி 3 ...

அபத்தங்கள் 

இந்த தேர்தலின் முன்னணி அபத்தம் கருணாநிதிதான். கடந்த ஐந்தாண்டில் தங்கள் அரசாங்கம் மக்களுக்கு செய்த நன்மைகளை பட்டியலிட்டு ஓட்டு கேட்கவேண்டிய கருணாநிதி. இன்னொரு முறை இலவசங்களை வாரியிறைப்பேன் என தேர்தல் அறிக்கை விட்டார். பிரதான எதிர்கட்சியான அ.தி.மு.க வை விடவும் விஜயகாந்தை கட்டம் கட்டுவதற்கு காட்டும் முனைப்பு எரிச்சலை ஏற்ப்படுத்துகிறது. தி.மு.க வின் அடிமட்ட தொண்டர்கள் வரைக்கும் மிகச்சிறந்த பேச்சாளர்களை கொண்ட கழகம் குஷ்பு, வடிவேலு என ரெண்டு காமெடி பீசுகளை களமிறக்கி பிரச்சாரம் செய்கிறது. சென்ற தேர்தல் வரைக்குமே தலைநகரத்தில் செல்வாக்கினை பெற்றிருந்த தி.மு.க இப்போது தலைநகரத்தை விட்டு ஓடிவிட்டது. தேர்தல் நடக்கும்போது தான் ஒரு காபந்து அரசுதான் என்பதனை மறந்து ஐயகோ மக்களே தேர்தல் ஆணையத்தின் அக்கிரமங்களை பாருங்கள் என தினசரி கூவுவது இன்னொரு காமெடி. 

அடுத்த அபத்தம் ஜெயலலிதா. தி.மு.க வின் தேர்தல் அறிக்கையை படித்துவிட்டு அதனினும் கூடுதலாக இலவசங்களை அறிவித்து மக்களை வெறுப்பேற்றியவர். நிச்சயமாக ஜெயிப்பார் என எல்லோரும் நினைத்த நாளில் கூட்டணியை குழப்பி ம.தி.மு.க வை வெளியேற்றி தான் இன்னும் மாறவேயில்லை என தெளிவாக்கியவர். இப்போதும் ஜெயிக்கும் வாய்ப்புகளை தன் வசம் வைத்திருக்கும் இவர் ஜெயித்தபின் செய்யபோகும் அபத்தங்களை நினைத்தால் இப்போதே வயிறுவலிக்கிறது.

அடுத்த அபத்தம் தேர்தல் அறிக்கைகள். இரு கழகங்களுமே மக்களை பிச்சைக்காரர்களாகவே பார்க்கிறது. இரண்டு அறிக்கைகளிலுமே உள்கட்டமைப்பு, மின்சாரம், கல்வி, தண்ணீர், சுகாதாரம்  போன்றவை பற்றி எதுவுமே இல்லை. தனியார்ப் பள்ளிகள், தனியார் மருத்துவமனைகள் பெருகிவருகிற சூழலில் அரசுப் பள்ளிகள், மருத்துவமனைகள் மேம்பாட்டுக்கான அறிக்கைகள் எதுவும் இல்லை. கடந்த ஐந்து வருடங்களாக தமிழகத்தில் இருக்கும் மொத்த நூலகங்களுக்கான நிதியை கோட்டூர்புரம் நூலத்துக்கு திருப்பிவிட்டது தி.மு.க அரசு. இம்முறை நூலகங்களுக்கான அறிவிப்புகள் ஏதும் இல்லை. 

அடுத்த அபத்தம் விஜயகாந்த். இந்தாளு போதையில் உளறுவதை பார்க்கிறபோது ஆக்சன் நடிகரான இவர் எப்படி காமெடிக்கு மாறினார் என்கிற ஆச்சர்யம் தோன்றுகிறது. இந்தாளு நான் யாருக்கும் பயப்பட மாட்டேன் என மக்களை பார்த்து பேசும்போது. அப்புறம் எதுக்குங்க இவ்வளவு கூச்சல் போடுறீங்க என மக்கள் நினைப்பதை யாராவது அடிவாங்கும் தெம்பிருக்கிற அல்லக்கைகள் நினைவூட்டினால் நல்லது. அ.தி.மு.க தனிபெரும்பான்மையுடன் ஜெயித்தால் அனேகமாக முதல் ஆப்பு காந்துக்குதான்.

அடுத்த அபத்தம் காங்கிரஸ்காரர்கள் இன்றைக்குவரை யார் தலைவர், யார் தொண்டன் என்று புரியாத புதிராக இருக்கும் ஒரே கட்சி. கருணாநிதியை மிரட்டி 63 தொகுதிகள் வாங்கியவுடனே தாங்கள் வெற்றி பெற்றுவிட்டதாக நம்புகிற காமெடியன்கள். இவர்களால்தான் தி.மு.க கூட்டணிக்கு மிகுந்த பின்னடைவே.

அடுத்த அபத்தம் வடிவேலு. கிட்டத்தட்ட தனது சினிமா கேரியர் போய்விட்ட நிலையில் சொத்தை காப்பாற்றிக்கொள்ள அடைக்கலம் தேடி தி.மு.க வில் ஐக்கியமாகியிருக்கிறார். முக்கிய தலைவர்களைவிட தி.மு.க மேடைகளில் இவருக்கு கொடுக்கும் முக்கியத்துவத்தை பெருமையாக நினைத்துக்கொண்டு இவர் பேசுவது முகம்சுளிக்க வைக்கிறது. 

அற்புதங்கள்

காலம்காலமாக தேர்தல் வந்தால் நள்ளிரவு வரை காதுகிழியும் கோசங்களை கேட்ட நமக்கு இந்த தேர்தல் ஒரு ஆச்சர்யமான சந்தோசத்தை தருகிறது. எப்படியாவது ஜெயித்துவிடலாம் என தி.மு.க வினர் கண்ட கனவில் தேர்தல் ஆணையம் மண்ணள்ளிப் போட்டுவிட்டது. நிறைய வெளிநாடுகளுக்கு சென்ற என்னைபோன்றவர்களுக்கு எப்போது நம் நாட்டில் இப்படி ஒரு மாற்றம் வரும் என கவலைப்பட்டபோது, இப்போதிருக்கும் நிலையைப்பார்த்தால் மிகவும் சந்தோசமாக இருக்கிறது. ஆனால் ஒரே ஒரு கவலைதான், அது ஒரு மாதம் தள்ளி தேர்தல் முடிவுகளை அறிவிப்பது என்கிற முடிவு. நம் தேசம் முழுதும் ஊழலில் மலிந்துகிடக்கும் இந்த சூழலில் இது எந்த அளவுக்கு பாதுகாப்பாக இருக்கும் என்பது கேள்விக்குறிதான். ஆனால் இந்த விசயத்திலும் தேர்தல் ஆணையம் மிக உறுதியான நேர்மையை கடைபிடிக்கும் என நம்புவோம். 

தேர்தல் ஆணையத்துக்கு ஒரு ராயல் சல்யூட்...