பேய்க்கதைகள்...

நிசப்த இரவுகளின்

தனித்த பயணங்களில் 

எதிர்ப்படும் பேய்கள் ஒவ்வொன்றிடமும்

இருக்கின்றன ஆயிரம் கதைகள்..

துணைக்கு வரும் அவற்றின் 

துயரங்கள்

கண்ணீராலும்.. ரத்தத்தாலும் 

எழுதப்பட்டவை..

சமயங்களில்

வழியை மறிக்கும் ரத்தக் காட்டேரிகள் 

நம்மை கட்டாயப் படுத்தி 

சொல்லும் புனைவுகளில்

வீர வரலாறுகள் 

மிகுதியாக இருக்கும்..

சுடுகாட்டில் 

அப்போதுதான்  சாம்பலான 

பிசாசுகள் 

சொந்தங்களின் துரோகம் சொல்லி 

ஆறுதல் தேடிக்கொள்ளும்..

புளியமரப் பேய்களோ 

தூக்கில் தொங்கும் அவஸ்தை பற்றி 

வெளித்தள்ளிய நாக்குடன் குழறும்..

விபத்தில் மரணமுற்றவை கதைகள் 

பயங்கரமானவை

கடைசி வினாடியில் ஒரே வலி..

எப்போதும் துரத்துகின்றன 

கொலையான பேய்கள் 

செய்தவன் கனவுகளில்...

கொள்ளிவாய்ப் பிசாசிடம் மட்டும் 

கவனம் வேண்டும்

பிரித்தாளும் சூழ்சிகள் கொண்டவை..

எப்போதாவது அபூர்வமாய் 

தனித்த பயணத்திலோ, 

நடுநிசிக் கனவிலோ வரும் 

பேய்களிடம்,

சிநேகமாக இருந்து பாருங்கள்

பேய்களின் புனிதம் அறிவீர்கள்..