ஆண்டான் அடிமை ...

கனவுக்குதிரை ஏறி
காற்றில் வாள் வீசும்
வந்தியத்தேவர்கள் நாங்கள்..

எமக்குப் பதிலாய்க்
காதலிக்க, கனிவு செய்ய
கவிதை வார்க்க, கத்தி வீச
திரைப் பிம்பங்களாய்
அவர்கள்..

பதில் மரியாதைக்குப்
போஸ்டர் ஒட்டிப் பாலூற்றுவோம்..

வெள்ளித் திரையில் வீரம் பேசி
விரிந்த கைகளில் மீட்பராய்த் தோற்றம்
அடுத்து அரசியல்,
அரியணைக் கனவு
நாங்கள்
அசட்டு ஆடுகள்
அவர்கள்
அணைக்கும் மீட்பர்கள்..

பிறந்தாலும், செத்தாலும்
ஹாரன் கிழிய அவர்கள் பாட்டு,
அழுக்கு நோட்டு எங்கள் பாடு..

ரத்தத்தின் ரத்தம்
உயிரின் உடன்பிறப்பு
உடல் மண்ணுக்கு
உயிர் அவர்களுக்கு
கொல்வதும் கொடுப்பதும்
கோர்ட்டுக் கூண்டும்
எங்களுக்கு..

பொண்டாட்டி பிள்ளை,
மச்சான், மாமன்,
கக்கூஸில் ஏசி
அவர்களுக்கு..

கலீஜான தியேட்டரில்
சிறுநீர்ப் பெருமழை
நாற்றம் தொலைக்க காஜா பீடி
வீதிக்கு வீதி டாஸ்மாக்
எங்களுக்கு..

பத்து கோடி மட்டும் சொத்து 
பார்த்து எழுதும் கள்ளக்கணக்கு
தந்திரப் புத்தி, எந்திர மனது
அவர்களுக்கு..

புழுத்த அரிசி, புண்ணாக்கு டிவி
இன்னுமிருக்கும் இலவசங்களுக்கும்
மூளை மழுக்கும்
டாஸ்மாக் சரக்குமாய்
தலைவன் புகழ்பாடும்
பிள்ளை உள்ளம்
வெள்ளை மனது
எங்களுக்கு..

அவர்கள் அவர்களே ..
அடிமைகள் நாங்களே!