என் பிரியத்துக்கு உரிய முதல் எதிரியே...

எந்த 

முன் அறிமுகமும் 

இல்லாத 

நம் முதல் சந்திப்பு 

மோதலில்தான் முடிந்தது,

நீ 

உனது கருத்துகளில் 

உறுதியாய் இருந்தாய் 

நானும் 

அவ்வாறாகவே எனது கருத்துகளில் 

உறுதியாக இருந்தேன்..

முதல் முதலான 

நம் சந்திப்பு 

இனி 

முகம் பார்க்கவே மாட்டேன் 

என கடைசியாக எச்சரித்ததுடன் 

முடிந்துவிடவேண்டும் என்பதுதான் 

எனது விருப்பமாகவும் இருந்தது..

ஆனால் 

உதவிக்கு யாருமற்ற 

ஒரு சென்னை இரவில் 

நான் அழிக்க மறந்த 

உனது பெயர் 

எனது தொலைபேசி அழைப்பில் 

இம்முறை 

நாம் பழையதை கிண்டவில்லை 

உனக்கு 

ஒரு இரவு மட்டும் 

தங்க இடம் தேவைப்பட்டது 

என் வீட்டில் உனக்கு இடம் இருந்தது..

மறுநாள் காலை 

நீ செல்லவேண்டிய இடத்தையும் 

பேசப்போகும் விசயத்தையும் 

சொல்லி முடிக்கும் முன்பாக

நான் 

என் வார்த்தை யுத்தத்தை துவங்க 

இன்னொரு முறை 

இறுதியாக முடிந்தது நம் சந்திப்பு 

என 

இறுதி ஒப்பந்தம் எழுதாத குறையாக 

பிரிந்து போனோம்..

இப்போதும் 

உன் எழுத்துகளை தவறாமல் படிக்கிறேன் 

தனி மடலில் 

கண்டனங்கள் தெரிவிக்கிறேன் 

உன் மறுப்பை 

அதே கோபத்துடன் எனக்கு எழுதுகிறாய்..

உனக்குத் தெரியுமா?

நான் அதிகம் நேசிக்கும் 

முதல் எதிரி நீதான் என்பதை!..

இப்போதும் 

ஒரு இறுதி சந்திப்பினை 

இன்னொரு முறை உறுதி செய்ய 

நாளை உன் ஊர் வருகிறேன் 

மறக்காமல் பேரூந்து நிலையம் 

வந்து சேரு..