தோற்றம் - மறைவு ...

பார்வைகள் தீண்டிக்கொண்ட 

ஒரு நொடியின் மரணத்தில்   

உயிர்த்தது நம் காதல்..

பறிமாறிக்கொண்ட அனைத்திலும்   

மேன்மையானது  

மின்தூக்கித் தனிமையின்  

முதல் எச்சில் வினாடிகள்..

அன்னிய தேசம்   

அலுவல் நிமித்தம்   

அனுப்பப்பட்டோம்,  

அங்கு   

அதிகப்படியான  இரவுகளை     

ஆதி மனிதர்களாய் கடந்தோம்..

இருவரின்
வாழ்வியல் கடமைகள்   

திருமண ஒப்பந்தத்தை   

தள்ளி வைத்து நகர்ந்த காலத்தில்   

ஊடாக வந்த நட்புகளால்   

சந்தேக சங்கடம் ..

நிலவை தொலைத்த   

நாளின் நள்ளிரவில்   

உரத்த குரலெடுத்து  கதறிய 

காதல்  

மறுநாள் அதிகாலை,  

பார்வைகள்  தீண்டத் தயங்கிய 

கணத்தில்    

மரித்துப்போனது..